Diamars mainta den Corte di Husticia a trata e caso penal cu Ministerio Publico a cuminsa contra e hoben Q.P. (19). E ta wordo acusa di posecion di arma di candela entre 27 April 2026 y 3 Juni 2026
SOLODIPUEBLO por a compronde cu Polis a haya 17 potret di armanan di candela y tambe video. Fiscal a exigi 24 luna di prison pa Q.P., kende ta para riba cu e potretnan ta sea di AI computer of bibi gun.
ACCION DI POLIS
Fiscal ta acusa Q.P. cu entre 27 April 2026 y 3 Juni 2026 e tabatin cantidad di pistoolnan y revolvernan.
Hues a bisa cu dia 28 Mei 2026, Fiscal di Ministerio Publico a cuminsa un investigacion riba Q.P. a base di informacion anonimo cu Polis a haya cu Q.P. tin arma y ta core un auto blanco.
Ta asina cu Polis tabata observa Q.P. y dia 5 Juni 2026, miembronan di Team di Aresto a detene Q.P. y confisca e auto. Hues Comisario a duna permiso pa Polis haci investigacion na e cas unda Q.P. ta biba.
Hues a bisa cu den e auto, Polis no a haya arma. Na cas tampoco a haya arma. Q.P. a bisa Polis cu e no tin arma. El a admiti di tabatin marihuana den auto y cu e no ta bende. El a admiti cu e tres tasnan den auto ta di dje y cu e tabata hinca e marihuana den saconan pa su mesun uso.
CANTIDAD DI POTRET DI ARMA DEN CELLULAR
Door cu no a haya mucho cos, Polis a laga Q.P. bay y a bay investiga den e cellularnan di Q.P. Den e cellular color biña, Polis a haya 17 potret di arma di candela y tambe tin videonan. E potretnan ta saca entre 27 April 2026 y 3 Juni 2026. Segun Polis, e potretnan ta mustra arma di berdad. Hues a bisa cu expertonan di arma a investiga e potretnan y a bisa cu nan ta parce pistool y revolver di berdad. Tabatin un potret cu Q.P. sinta den auto cu un arma. Segun Q.P. ta un revolver fake. Tambe cu tin di e armanan ta air soft, bibi gun. Tambe Q.P. a bisa cu tin potretnan AI o sea artificial haci via computer. Polis a mira potret di un arma automatico cu ta parce berdad pero Q.P. ta bisa cu e ta AI. Tin potretnan di peña cu balanan aden. Segun Q.P. ta AI. Tambe tin potret di Q.P. sinta cu un revolver y pistool. Segun Q.P. el a cumpra nan na un lugar na Santa Cruz y cu nan ta bibi gun.
Hues a bisa cu tin video cu saco yen di bala. Segun Q.P. ta AI di computer. Tambe tin un video di Q.P. cu arma den man. Segun Q.P. ta AI.
Fiscal a remarca cu Q.P. a bisa Hues cu dos di e armanan ta fake y a sconde nan pero no kier bisa na unda. Fiscal a sigui bisa cu Q.P. a bisa Polis cu si nan lage bay, e lo busca e armanan. Fiscal a puntra Q.P. pakico e no a usa e oportunidad pa demostra cu e armanan ta fake. Segun Q.P., si e bisa, Team di Aresto lo bay haci investigacion y e no kier haya problema cu hende. Hues a remarca cu e manera di papia di Q.P. ta mustra cu e armanan ta scondi serca un hende. Q.P. a confirma cu e armanan ta serca un hende.
FISCAL A EXIGI 24 LUNA DI PRISON
Fiscal a bisa Hues cu e caso aki ta relaciona cu cantidad di armanan. Fiscal a bisa cu e no ta kere declaracion di Q.P. El a mustra cu expertonan ta mustra cu e armanan ta real y Q.P. ta bisa cu el a haci e armanan via computer AI. Fiscal a sigui bisa cu Q.P. no tabata duna Polis mas informacion tocante con el a haci esakinan. Na opinion di Fiscal, esaki ta duna e impresion cu ta armanan real nan ta. Fiscal a enfatisa cu e no ta kere Q.P. El a bisa cu minimo Q.P. tabatin un pistool y revolver, un arma automatico AK 15 y balanan. Fiscal a bisa cu e no tin motibo di duda den Polis.
Pa cu e castigo, Fiscal a bisa cu Q.P.(19), ta promer biaha cu e ta cay den man di husticia pa un caso serio asina. El a mustra cu Ministerio Publico tin maneho stipula. Fiscal a mustra cu tabatin casonan lamentable recien a sosode caminda hoben a wordo tira mata. Ministerio Publico no ta tolera cu tin arma ta circula ariba Aruba. Fiscal a mustra riba e actitud di Q.P., di no kier bisa nada. Segun Fiscal, normal e castigo mester ta 48 luna di prison pero den e caso aki Fiscal ta tene cuenta cu circumstancianan y a exigi 24 luna di prison di cual 6 luna ta condicional y un tempo di prueba di 2 aña.
ABOGADO TA CUESTIONA INVESTIGACION
Abogado MR. Soekandar a bisa Hues cu Polis a laga Q.P. liber pasobra no tabatin nada di arma. E abogado a señala cu un hende anonimo a bisa Polis cu Q.P. ta bende droga for di un cas y tabatin arma. A base di esaki a haci investigacion y no a haya droga y tampoco arma. Polis mes a bisa cu no por bisa si ta confia riba e informacion anonimo. E abogado a remarca, con Polis ta bay haci investigacion asina grandi si ta solamente un informacion anonimo tin. El a mustra cu Team di Aresto a detene Q.P. coriendo den auto y despues Polis a haci investigacion na e cas. E unico cos cu ta cuadra di e informacion anonimo ta, cu Q.P. tabata core un auto blanco. E abogado a sigui bisa cu Polis no tabatin sospecho cu Q.P. tabatin arma. E abogado ta haya cu e investigacion ta inhusto pasobra no ta bisa si e informacion anonimo ta confiabel. Ademas e abogado ta haya cu Polis a viola normanan. El a bisa Hues cu Polis a haci investigacion inhusto pa haya cosnan pa detene Q.P. E abogado ta haya cu door cu Polis a viola normanan, el a pidi Hues pa kita e pruebanan o sea potretnan di armanan y declara Q.P. liber. E abogado a bisa cu a a base di ley, 1 testigo no ta suficiente. A base di 1 yamada a bay haci investigacion asina grandi.
Fiscal a bisa Hues cu tin hurisprudencia caminda por haci uso di informacion pa haci investigacion. A bay haci observacion cu ta mustra cu tin motibo pa a haci investigacion.
Hues a bisa cu e ta bay evalua e caso y dia 3 September 2026 lo tin sentencia.
