Rasmijn a admiti cu e tabata na sitio, pero pa cumpra heroina…
Lo dicta sentencia dia 24 di mei pa 4or di atardi.
Diabierna mainta 6 di Mei 2022 a inicia e caso di asesinato di Poentje Castro di dia 22 di December 2010. E caso a hiba e nomber di Apollo, cual ta e caya di e cas unda Poentje a biba, Apollostraat.
Anderson Rasmijn ta un persona Colombiano, naci na Colombia, pero desde mucha a bini Aruba. E acusado Rasmijn a admiti na huez cu e tabata na e sitio, pero segun el’a declara, e no a mata y no a mira algo tampoco. Rasmijn a sigui bisa, cu el’a bay eybanda pa cumpra heroina y ta admiti cu e tabata eynan.
E caso a start pa 8.30 di mainta, pero a surgi un discucion entre fiscal, abogado di Rasmijn y huez pa un rapport di dokter. Ta parce cu Dokter Van Gaalen lo no a traha e rapport, pa cual sin un rapport, e caso lo no por sigui.
Abogado di Rasmijn ta di opinion cu e situacion di Rasmijn ta di tal forma cu e no por wordo enhuicia, esta cu e no ta mentalmente resposabel pa su actonan. Segun e abogado, cu Rasmijn ta lubida. Pesey mes a pone basta precion, cu si no tin rapport, e caso mester wordo posponi.
Corte a yama dokter van Gaalen, y a pidie’le pe bin duna un resumen den corte, di loke lo bay wordo skirbi den rapport. Van Gaalen a acudi na corte y asina e caso por a sigui for di 11or di mainta y a termina pa 3.30 di atardi.
Ta acusa Rasmijn cu el’a los tiro y mata Poentje. E tin otro caso tambe contra dje, unda el’a menasa un tal Fernando Fernandez cu un cuchuiw.
E sospechoso Rasmijn a admiti den corte cu su persona tabata den Apolo straat riba e anochi di asesinato, pero no a tira Poentje Castro. E tabata den e caya pa cumpra heroina. Huez a keda puntre kico e tabata tin den su man y el’a contesta cu e ta usa su derecho di silencio. Tin un video cu a wordo haya for di bisiñanan unda ta reconoce Rasmijn den e video y unda e ta sali na carda cu algo den su man. Riba e pregunta aki, e no kier a contesta huez ta kico e tin den su man.
Nota di redaccion: Pa e hecho cu Rasmijn a dicidi di haci uso di su derecho di silencio y no kier contesta huez, por ta un redflag cu e ta scondiendo algo.
Sentencia ta wordo duna dia 24 di mei pa 4’or di atardi.
