Diahuebs a tene un Accion den Bario na San Nicolas cu bishita di Prome Minister Mike Eman, hunto cu Parlamentario Clifford Heyliger y Parlamentario Otami Thomasia. Durante e accion nan a bishita Prinsenstraat, Adolf van Nassaustraat, Marnixstraat y Willem de Zwijgerstraat.
Como parti di e bishita, Prome Minister Mike Eman tambe a reuni cu Pastoor Tom y Victoria Gibbs di Seed of Life Ministries Church na Bernhardstraat 185, un punto importante di fe y sosten den comunidad di San Nicolas. Durante e encuentro nan a intercambia pensamento tocante e rol positivo cu iglesia ta hunga den comunidad y den fortalece unidad social.
Na yegada na cada cas, habitantenan a expresa nan satisfaccion cu presencia di Prome Minister y e parlamentarionan, kende personalmente a acudi den e bario pa scucha nan preocupacion y busca solucion directo. Diferente habitante a expresa nan aprecio pa e hecho cu gobierno ta sali for di oficina y ta bay directamente den comunidad pa mira e situacion cu su propio wowonan.
Responsabilidad comparti entre gobierno y pueblo
Segun e habitantenan, Accion den Bario no solamente ta yuda identifica y resolve necesidadnan concreto, sino tambe ta fortalece e sentido di responsabilidad comparti entre gobierno y comunidad.
E accion a conta cu presencia di diferente departamento di gobierno, incluyendo e Departamento di Asunto General cu ta cay directamente bao di Prome Minister Mike Eman. Henter e ekipo a traha hunto pa atende necesidadnan relaciona cu limpiesa, siguridad, infrastructura y calidad di bida.
Habitantenan a enfatisa cu e colaboracion entre diferente departamento di gobierno ta produci resultadonan visibel den comunidad. Pa nan, e hecho cu problemanan relaciona cu mantencion, limpiesa y siguridad ta wordo atendi na un manera coordina ta mustra un gobierno cu ta cerca di pueblo y comprometi pa mehora e calidad di bida den nos barionan.
City Inspector (BCI) y Serlimar a haci un tremendo trabou di limpiesa durante e accion. Pa e operacion tabata tin 3 ploeg di Serlimar y 2 ploeg di City Inspector, sumando un total di 10 empleado y 5 pickup dedica na recogemento di sushi. Durante mainta a yena 3 container di 30 yarda cada un, representando un total di 90 yarda cubico di sushi cu a wordo saca for di e bario.
E resultado aki a contribui na laga cayanan y barionan mas limpi, mas ordena y mas agradabel pa tur habitante.
Un biaha mas nos por mira un meta cumpli.
Accion den Bario ta un programa inicia pa Prome Minister Mike Eman cu e obhetivo di atende necesidadnan den comunidad, soluciona problemanan manera limpiesa, recogemento di desperdicio y otro preocupacion cu ta afecta e calidad di bida den e bario, mientras ta mantene un dialogo directo cu e habitantenan.
Prome Minister Mike Eman a haci uzo di e ocasion pa recorda e pueblo di Aruba tocantep e apertura oficial di e Zona di Desperdicio nobo di EcoTech na Barcadera. E facilidad nobo ta ofrece na tur ciudadano e oportunidad pa deposita diferente tipo di desperdicio gratis, di un manera responsabel y amigabel cu medio ambiente.
Cu e inauguracion oficial di e Zona di Desperdicio nobo, Aruba a duna un paso importante den e vision pa modernisa y fortalece e maneho di desperdicio riba nos isla. E iniciativa ta forma parti di un esfuerso nacional pa mantene Aruba limpi, promove separacion y procesamento corecto di desperdicio y proteha nos medio ambiente pa e generacionnan di futuro
Segun Prome Minister Eman, Accion den Bario y Zona di Desperdicio ta complementa otro. Mientras Accion den Bario ta yega directamente den comunidad pa atende necesidadnan inmediato, e Zona di Desperdicio ta brinda un facilidad permanente pa evita cu desperdicio ta termina den mondi, banda di caminda of den nos barionan.
Prome Minister Mike Eman a gradici tur habitante pa nan cooperacion y feedback, y tur partner envolvi pa nan esfuersonan continuo pa un San Nicolas mas limpi, mas sigur y mas uni.
