Fiscal a presenta 3 acusacion y pidi pa declara e sospechoso liber di un acusacion: Miembro di Guarda Costa sospecha di a horta motor di boto, horta municion y pisca calco

E homber E.F. (34) a presenta den Corte pa e caso penal cu Ministerio Publico a cuminsa contra dje. Fiscal ta sospecha E.F. di a horta den Guarda Costa.

   SOLO DI PUEBLO por a compronde cu E.F. su abogado a cuestiona e hecho cu E.F. no a haci nada contra ley y awor ta busca manera di kit’e for di trabao cu acusacionnan cu no tin prueba.

   E acusacionnan cu Fiscal a presenta contra E.F. ta cu na Maart 2023 e lo a horta motor di un boto na Cuartel di Guarda Costa. Tambe E.F. ta wordo acusa di a horta flares y municion for di Cuartel di Guarda Costa. Fiscal tambe ta acusa E.F. di tabata pisca calco siendo cu calco ta un bestia di laman protehi pa ley.

SOSPECHA DI A HORTA MOTOR DI BOTO

   Hues a mustra cu E.F. ta wordo acusa cu 13 Maart 202, e lo a horta un of mas motor di boto. E.F. ta desmenti esaki. El a splica cu e ta un portier meester. Nan tabata sinta eynan y un hende di Departamento Tecnico, I., a pidi’e pa yuda kita motor di un boto den Guartel di Guarda Costa. E.F. a bisa Hues cu nan a bay caminda tin hopi boto y motor cu no tin label cu ta confisca pero cu lo tin investigacion andando y a coy un motor pa pone e motor riba un boto pa I. haci un test. E momento cu nan tabata pone e motor riba un otro boto, nan a mira dos miembro di Guarda Costa, B. y M. ta cana bay na e botonan. A pensa cu sigur e hendenan aki lo bay haci redashi robez. E miembro di D.T. a bisa E.F. pa papia cu e hefe P. pa no tin mal comprondemento. Segun E.F., el a splica P. tur cos y tur cos a keda aclarea. E hefe a yama I. y despues a bisa E.F. pa nan bay pone e motor bek.

   Hues a mustra cu tin un chat di grupo di miembronan di Guarda Costa caminda ta papia cu paga tino cu camera cu ta mira tur movecion unda e botonan y motornan ta. E.F. lo a bisa cu e camera no a mir’e. Hues a puntra E.F. kico esey. El a splica cu esnan den grupo tabata chat riba algo cu no ta concerni e.

   Hues a bisa cu Landsrecherche a haci investigacion y a confisca cellular di E.F. Tur ta relaciona cu loke a sosode 13 Maart 2023. Hues a mustra cu tin un combersacion di E.F. cu un amiga caminda el a bisa e amiga cu el a horta un motor y awor e ta bay busk’e unda el a bay sconde. Tambe E.F. lo a bisa cu e tin un otro mas pa asina e amiga sa cu e lo tin 2 motor. E.F. a remarca cu e no por sali cu un motor di boto for di base di Guarda Costa. El a sigui bisa cu e lo a gaña e amiga algo. E.F. ta para riba cu e no a horta motor di boto y cu e no tin mester di motor pasobra e no tin boto y no ta pisca. Hues a mustra cu tin mas combersacionnan entre otro cu mas laat E.F. lo a bisa su amiga cu e mester hiba e motor bek. Hues tambe ta mustra cu tin combersacion caminda E.F. ta bisa cu e hefe P. lo a “dek” p’e no wordo castiga. Hues a bisa cu si mira tur e combersacionnan, ta crea e sospecho cu E.F. lo a coy e motor y cu P. a duna E.F. un chens pa busca e motor na cas y hib’e bek y lo no tin problema. E.F. a bisa Hues cu ningun momento a saca e motor for di Cuartel di Guarda Costa. E ta para riba cu e no a horta ningun motor.

SOSPECHA DI A HORTA MUNICION

Hues a mustra cu e otro acusacion ta bisa cu entre 4 y 11 Maart 2023, E.F. lo a horta flares. E.F. a splica Hues cu eseynan ta flares cu a caduca y no ta usa mas. El a splica cu un colega F. lo mester a haci’e y a pidi E.F. pa haci’e p’e. Hues a mustra cu tin chat di miembronan di Guarda Costa caminda F. lo a bisa cu e tin den su cashi flares y municion bieu di shot guns den cashi cu el a haya for di B. pa benta afor den laman pero e no a haci’e. A palabra cu lo deshaci di nan. E.F. a bisa Hues cu Guarda Costa no tin shut gun. El a bisa cu F. a dun’e na Guarda Costa un caha cu e flares pa e deshaci di nan. Segun E.F., F. ta su hefe.

SOSPECHA DI PISCAMENTO DI CALCO

Ta sospecha E.F. di lo tabata pisca calco, cual ta ilegal. E.F. a bisa Hues cu ta berdad cu ta prohibi pa pisca calco. El a bisa cu su famia, pa hopi tempo ta come calco. Su mayornan sa cumpra calco for di Chines y ta bende pan cu calco. Hues a mustra cu tin chat cu E.F. ta papia di un tent di come. E.F. a bisa Hues cu e tent no ta di dje sino di su mayornan y e tabata haci propaganda pa nan haya hende bay cumpra calco. Hues a mustra cu tin un chat caminda E.F. ta manda papel cu tin tent di come pan cu calco pero en realidad e tent ta di su mayornan. E.F. a bisa cu e ta tuma pedida di coleganan y e ta busca e pannan y hiba nan na su cas. E coleganan ta pasa busca serca dje. Hues a mustra cu tin un chat caminda E.F. ta bisa un persona M., danki pa bay pisca calco sin dje. Hues a mustra cu E.F. lo a bisa M. cu e lo bay pisca calco banda di dump. E lo a bisa M. cu el a bula banda di dump den laman y tin masha hopi mes. M. a bisa cu tin masha hopi mes banda di dump y Palm Island. E.F. lo a bis’e cu tur weekend e ta bende. E.F. a bisa Hues cu e no ta pisca calco y cu su mayornan ta cumpra for di Chines.

FISCAL

Fiscal a bisa Hues cu E.F. ta traha na Guarda Costa y ta un agente di Polis. E mester comporta su mes como un empleado ehemplar. Tabatin investigacion di Landsrecherche caminda a constata cosnan no bon tabata tuma lugar. Fiscal a bisa cu a tene Tomzitting pa E.F., pero E.F. no kier a accepta. Fiscal a mustra cu tin chatnan di whatsapp cu ta mustra cu E.F. mes ta bisa cu el a horta un motor di boto for di Cuartel di Guarda Costa y cu e lo bay horta un otro motor mas. Fiscal a mustra cu den chat di grupo di Guarda Costa, ta papia cu a mira cu a bay cu motor di boto. E.F. a papia cu F. cu el a coy un motor y P. a bis’e pa trece e motor bek. P. a dun’e un chens. Fiscal a remarca cu esaki ta mustra cu E.F. a malversa un motor di boto. E ta haya legalmente proba cu E.F. a malversa e motor di boto.

   Fiscal a mustra tambe riba chat riba flares y municion di shotgun caminda E.F. lo a tuma for di F. un caha cu esakinan pa e deshaci di nan. Fiscal a mustra cu diferente miembro di Guarda Costa a wordo interoga. E.F. a bisa cu e no ta corda mucho bon y no a tuma nada. Den Corte E.F. ta bisa cu el a haya nan for di F. Fiscal a bisa cu e tin problema cu e declaracion di E.F. E ta haya cu ta trata aki di cosnan ilegal cu E.F. a hiba cas. Fiscal no ta haya cu tin prueba suficiente y ta pidi pa declara E.F. liber di e acusacion aki.

   Pa loke ta calco, Fiscal a bisa cu investigacion riba cellular di E.F. ta duna indicacion cu E.F. tabata pisca calco y tabata busca mas for di otronan. Tambe e ta bisa cu ta su mayornan tabata cumpra for di Chines. Su mayornan tabata bende pan cu calco y E.F. tabata propaganda esaki. Fiscal ta haya cu dos biaha E.F. mes a bay cu boto pisca calco.

   Pa cu castigo, Fiscal a mustra cu un empleado di Guarda Costa, ta viola ley. Fiscal ta haya cu E.F. a abusa di su posecion como miembro di Guarda Costa pa yega na e motor di boto. Tambe a viola ley, door di pisca calco siendo cu e sa cu ta prohibi pa pisca calco y cu ta Guarda Costa mes ta controla esaki. Fiscal ta bisa cu E.F. a abusa di su posecion, envez di duna ehempel. El a exigi 100 ora di trabao pa E.F.

ABOGADO TA CUESTIONA SET UP

Mr. Carlo a bisa Hues cu e caso aki ta basa riba pruebanan circumstancial. E abogado a mustra cu otro miembronan di Guarda Costa cu tabata envolvi den investigacion haci door di Landsrecherche, a haya castigo. E abogado a bisa Hues cu esaki tabata e guera frieu entre Inteligencia Hulandes y Inteligencia Arubano. E.F. tabata envolvi den esaki y el a scoge pa Inteligencia Arubano. Na opinion di mr. Carlo, esey a pone cu a tuma represaya contra E.F. E abogado ta haya cu no tin ningun prueba cu e motor a wordo horta, cu a coy flares y municion, cu a pisca calco. Tur esakinan ta a base di chat caminda e miembronan di Guarda Costa tabata papia cosnan pa mustra tof y esakinan a wordo usa contra nan. E abogado a bisa Hues cu ningun momento e motor di boto a wordo saca for di Guarda Costa. E.F. a kere cu e motor ta di boto cu mester wordo deshaci di dje y no cu ta un boto confisca. E.F. mes a bisa den grupo di chat cu camera no a mir’e pasobra ta puro joke ta wordo haci y e ta sigur cu e no a haci nada malo. E abogado a sigui bisa cu e hefe mes a bisa E.F. pa pone e motor bek. E ta haya cu mester declara E.F. liber.

   Pa loke ta flares y municion, e abogado a mustra cu ta F. a bisa cu el a duna E.F. na Guarda Costa un caha cu flares y municion pa deshaci di nan. F. E abogado a bisa cu no tabatin municion. El a bisa cu ta un hefe a duna e cosnan pa deshaci di nan y no tabata ilegal. E abogado a pone enfasis cu E.F. no a haci nada contra ley. Ta cosnan cu a caduca y a deshaci di nan na Guarda Costa mes. E abogado a bisa Hues cu E.F. a sigui orden di su hefe y no a haci mal uso di su funcion. Mr. Carlo ta haya cu mester declara E.F. liber.

  Pa loke ta calco, mr. Carlo a bisa Hues cu e colega di E.F., M. mes a bisa cu e no a bay pisca calco cu E.F. y no tin palabracion entre nan pa cumpra calco. M. a bisa cu e ta cumpra calco for di Chines cu ta haya calco for di Nicaragua. E abogado a mustra Hues documento cu e calconan cu tin na Aruba, ta den henter e region o sea Venezuela, Colombia. E abogado ta di opinion cu Landsrecherche, a base di combersacionnan cu a scucha, ta pretende cu E.F. tabata pisca calco cual no ta asina. E abogado a mustra cu e calconan ta procedente di Chines of for di awanan Venezolano. Mr. Carlo a bolbe ripiti cu mester declara E.F. liber.

   Abogado ta bisa Hues, cu E.F. ta para riba cu e ta inocente y pesey e no a bay di acuerdo cu Tom Zitting. E abogado a splica Hues cu E.F. a coopera completo den investigacionnan cu a tuma lugar. Awor Fiscal ta declara E.F. liber pa un acusacion y tog ta exigi e mesun castigo di 100 ora di trabao. Abogado ta haya esaki no corecto. Hues a bisa cu e ta bay studia e caso y dia 8 October 2026, lo tin sentencia.