ORANJESTAD – Fundacion Parke Nacional Aruba (FPNA) ta anuncia cu e proceso di stakeholder engagement pa Parke Marino Aruba lo intensiva den e lunanan binidero. Esaki lo cuminsa cu anochinan informativo y un encuesta. Despues lo continua cu algun workshop, sesion interactivo y reunionnan pa asina por yega na un plan di maneho cu ta considera no solamente e meta primordial di conserva naturalesa, pero tambe ta incorpora e aspectonan social y economico.
E prome anochi informativo lo tuma luga ariba diferente fecha na diferente sitio. Asina FPNA ta spera di por brinda tur interesado e oportunidad pa participa.
E anochinan informativo lo tuma luga riba dia:
- Diahuebs, 19 augustus 2021, na Centro di Bishitante di Parke Nacional Arikok
- Diasabra, 21 augustus 2021, na MFA Savaneta
- Diamars, 24 augustus 2021, na Centro di Bario Playa Pabao
- Diahuebs, 26 augustus 2021, na San Nicolas (lugar exacto lo confirma)
- Si tin hopi peticion lo por añadi cu mas sesion
Diferente stakeholders cu durante e ultimo añanan a demonstra nan interes of cu tin un funcion crucial pa Parke Marino Aruba a ricibi un invitacion pa participa den un di e anochinan aki. FPNA ta extende e invitacion aki pa publico en general pa asina tur esnan interesa tin e oportunidad di participa. Pa motibo di Covid-19 y pa percura cu nos cumpli cu medida di seguridad di salud, nos ta pidi pa tur invitado y interesado registra prome via nos formulario digital of yama na 585-1234 ext. 228.
Banda di e anochinan informativo tambe tin un encuesta cu lo publica ariba nos Facebook page y website pa tur stakeholder por duna nan perspectiva riba algun aspecto di Parke Marino Aruba. FPNA kier encurasha tur habitante di Aruba pa yena e encuesta aki pa contribui na e futuro di Parke Marino Aruba.
Despues di e anochinan informativo y e encuesta e proceso lo sigui cu un workshop interactivo pa hasi un SWOT analisis (strengths, weaknesses, opportunities and threats), unda lo evalua for di e punto di bista di e meta primordial di conservacion di naturalesa, kico ta e aspectonan fuerte, debil, oportunidad y menasa. E workshop aki lo tuma luga na september.
Cu e resultado di e encuesta, anochi informativo y e SWOT analisis, FPNA lo tene un workshop interactivo unda e diferente stakeholders por sinta hunto pa delibera ariba diferente zona y regulacion den e areanan di Parke Marino Aruba. E workshop aki lo tuma luga na november.
Tur e resultadonan aki hunto cu resultado di investigacionnan biofisico, manera e presencia y salud di coral, yerbe di lama y otro bida marino, lo yega na e plan di maneho di Parke Marino Aruba pa e proximo 5 aña (2022-2026). E parti di zona y regulacion lo pasa un tanda di revision unda tur stakeholder lo tin e oportunidad di lesa e plan y duna nan ‘zienswijze’ ariba esaki den luna di januari 2022. Despues di procesa y contesta e ‘zienswijzen’, FPNA lo publica e plan di maneho oficial. Banda di e sesionnan organisa, FPNA semper ta keda dispuesto pa reunionan cu nos stakeholders ariba peticion. Pa esaki y mas informacion tocante Parke Marino Aruba por tuma contacto cu marinepark@arubanationalpark.org.
