Fraccion di MEP a duna inicio oficial na un serie di dialogonan cu stakeholders clave den e cadena di salud mental na Aruba. E prome reunion a tuma lugar cu e representantenan di Respaldo, caminda a habri un espacio pa scucha e realidad cu e profesionalnan den e “frontline” ta enfrenta diariamente.
Lider di MEP, sra. Evelyn Wever-Croes, a enfatisa cu e iniciativa aki ta nace for di un preocupacion profundo pa e aumento alarmante den casonan di suicidio den e ultimo lunanan. “Salud mental no ta un tema di politica; e ta un crisis cu ta afecta nos hogarnan y nos futuro como nacion. Tras di cada cifra tin un famia destrui y un dolor cu nos como pais no por sigui ignora,” Wever-Croes a declara.
Scucha pa por actua E meta principal di e Mesa di Dialogo aki ta pa Fraccion di MEP haya informacion directo for di e instancianan social, mirando e falta di claridad y comunicacion for di e banda di Gobierno actual riba e topico aki. Durante e reunion cu Respaldo, e parlamentarionan a ricibi informacion riba e retonan cu Respaldo ta enfrenta como tambe sugerencia pa facilita nan trabou.
Plan di Accion di Pueblo E reunion cu Respaldo ta solamente e prome paso. Fraccion di MEP lo sigui reuni cu tur e stakeholders relevante. Na final di e serie di dialogonan aki, e fraccion lo presenta un resumen cu tur recomendacionnan concreto, un “Plan di Accion di Pueblo”, cu e meta pa esaki sirbi como herment pa Gobierno y por keda implementa na bienestar di pueblo.
Wever-Croes a conclui bisando: “Nos no kier papia pa nan, nos kier scucha for di nan. Nos ta aki pa trece solucion. Pa MEP, e prioridad semper ta y lo keda e famianan di Aruba. Hunto, nos lo sigui aporta pa crea e futuro caminda tur ciudadano ta sinti nan mes protehi, scucha y cu nan por haya e ayudo cu nan mester.”
