Den cuadro di Dia Mundial di Siguridad y Salud na Trabou Fraccion di MEP a haci uzo di su rol constitucional pa haci pregunta na Minister di Labor tocante siguridad y salud na trabou, y tambe siguridad social na pia di trabou, incluyendo proteccion contra conducta inaceptabel “grensoverschrijdend gedrag”.
MEP ta considera cu un ambiente di trabou sigur no ta un luho, sino un derecho basico di cada trahador. Pesey e fraccion kier haya informacion tocante control, cumplimento di reglanan existente y proteccion efectivo contra abuso, intimidacion y otro forma di conducta inaceptabel riba luga di trabou.
Cu esaki na mente, fraccion MEP a manda un serie di pregunta pa Minister di Labor Wendrick Cicilia, enfoca riba:
• su vision y meta concreto pa mehora siguridad na trabou,
• e nivel di inspeccion y cumplimento di ley,
• responsabilidad di empleadonan,
• y medida concreto pa combati conducta cu ta pasa limite, manera intimidacion y acoso sexual.
Fraccion MEP ta di opinion cu transparencia y “accountability” ta esencial pa logra mehoracion real. Pueblo di Aruba tin derecho di sa con e gobierno ta proteha nan seguridad y dignidad na pia di trabou.
Conforme reglanan di Parlamento, e minister tin un periodo di tres (3) siman pa contesta e preguntanan presenta.
Fraccion MEP lo sigui monitorea esaki cu rigor y no ta exclui paso adicional si resulta cu e contesta no ta satisfactorio of si falta accion concreto.
