Den marco di e conmemoracion mundial di 75 aña di Declaracion Universal di Derechonan Humano EVRM, Universidad di Aruba a tene un evento dedica na e importancia y aplicacion di e derechonan humano na Aruba. Pa Fraccion di MEP tabata presente Parlamentarionan Evelyn Wever-Croes y Xiomara Maduro.
E evento a conta cu e presencia di Sra. Jolien Schukking, hues di e Hof di Husticia Europeo (Court of Justice of the European Union), cu a comparti su conocemento y perspectiva tocante e papel fundamental di e derechonan humano den un sistema di husticia moderno. Su mensahe principal tabata pa mas instancia publico, scolnan y organisacionnan social dedica atencion na informa y orienta nos comunidad riba e derechonan universal aki, pa fortifica un cultura di respet, igualdad y dignidad humano.
Durante e sesion, oradornanan local a splica con e derechonan humano ta wordo uza den practica di dia pa dia na Aruba. Den hopi caso dilanti di hues, ta recuri na derechonan ancra den EVRM ora cu e caso ta dura mucho largo. Na Universidad di Aruba tambe ta dedica tempo den les y tambe via Tienda di Ley pa haci e studiante y e ciudadano consciente di e derechonan humano. A enfatisa tambe riba e hecho cu hopi trahadornan na Aruba no ta conoce nan propio derechonan bon, y cu pesey e dunado di trabou tambe mester tene e principionan di e derechonan humano den consideracion ora di tuma decision of trata cu personal. Ta importante pa sa cu e Statuut di Reino Hulandes tambe ta tene cuenta cu e derechonan humano manera parti integral di e relacion constitucional den Reino.
E evento a finalisa cu un presentacion artistico den cual na manera visual y emotivo, a mustra con den bida real e derechonan humano ta wordo viola. Ehempel manera muchanan cu no por bay scol pasobra nan mayornan no tin placa of wordo descrimina of keda sin atencion medico debi na status ilegal. E obra a trece un mensahe cla y fuerte: e derechonan humano ta e fundamento pa sigura dignidad, libertad y husticia pa tur hende na Aruba.
