Parlamentario Dangui Oduber: Nos no por entrega nos Libertad pa un sakito di placa: Oposicion, 13 sindicato na Aruba, 10 mil hende y Mike de Meza ta contra e Rijkswet Hofa!

Porfin despues di a warda 10 luna pa e debate di rijkswet, e reunion publico a wordo trata diamars ultimo 28 oktober 2025 den Parlamento. Lamentablemente e reunion no a continua y un biaha mas a wordo geschorst.

Loke tawata remarcabel durante e reunion aki tawata e hecho cu ni minister Gerlien Croes, ni minister Geoffrey Wever ni promer minister Eman por a convence parlamento pakico mester entrega nos libertad y autonomia. Durante e reunion a bira cla tambe cu NO tawata tin un decision di conseho di minister di gobierno Avp-Futuro pa presenta e concepo di Rijkswet Hofa na conseho di minister di reino.

Durante e reunion tambe parlamento a ricibi un carta di 13 sindicato na Aruba cu ta representa miles di trahador caminda nan a fiha un posicion y bisa cu nan tur ta CONTRA e rijkswet HOFA pasobra e ta mina nos autonomia y kita nos libertdad. No solamente esaki sino sr Mike De Meza como miembro di fraccion di Avp tambe a bisa cu e ta totalmente contra entrega di nos libertad y autonomia. Aki nos ta conclui cu NO tin consensus na Aruba pa bay di acuerdo pa entrega nos autonomia. Te hasta sindicatonan di Boneiro ta sostene e lucha contra entrega di nos autonomia anto aki tin politconan cla pa traiciona nos pais.

Un gobierno serio y responsabel mester respeta deseo di un pueblo y deseo di e pueblo aki ta pa NO entrega nos autonomia y torno na nos status aparte. Bo ta sinti claramente na e posicion di sindicatonan cu nos como pais NO por accepta e rijkswet hofa aki y tin otro alternativa pa logra e mesun propsito di un maneho financiero solido.

Mi ta cita loke e 13 sindicatonan a conclui riba e tema di rijkswet Hofa:

‘Pais Aruba a demostra seriedad y compromiso pa cumpli cu palabracionnan haci, sin cu mester a kita autoridad final for di su Parlamento scogi democraticamente. Pues ta na su lugar pa sali un mensahe cla y decisivo di parti di esnan cu a wordo scogi door di pueblo di Aruba pa papia den nan nomber, cu no tin consensus riba regulacion di supervicion di finansas publico di Aruba por medio di un rijkswet.’

Nos ta spera cu e reunion continua pasobra e deseo di nos pueblo mester wordo respeta. E gobierno di Avp-Futuro NO tin e mandato pa bay entrega nos libertdad, nos autonomia y nos status aparte pa un sakito di placa pasobra esey e ta, pa un besparing di 11.6 miyon florin pa aña nos lo perde nos dignidad, nos libertad y nos derecho di autodeterminacion. Placa HAMAS y NUNCA por cumpra Libertad di un pais pasobra LIBERTAD NO TIN PRIJS!!!!