Fundacion Epilepsia Aruba ta orguyoso di anuncia e lansamento di su programa di television “Bo No Ta Bo So”, cu lo cuminsa transmiti dia 4 di augustus 2026 riba Tele Aruba pa 8:45 di anochi.
E programa su meta ta pa brinda informacion confiabel, crea mas comprondemento y aumenta consciencia tocante epilepsia na Aruba. Pa medio di combersacionnan habri y educativo, televidentenan lo por conoce mas tocante e condicion, kibra mitonan y tende historia real di personanan cu ta biba cu epilepsia y nan famianan.
Durante e diferente episodionan, e programa lo conta cu participacion di medico, specialista, persona cu ta biba cu epilepsia, y mayornan cu tin un yiu cu epilepsia, compartiendo nan conocemento, experiencia y conseho.
E programa lo ta presenta pa Jasmin Wever, PR di Fundacion Epilepsia Aruba, na nomber di e fundacion. Cu cada episodio, e fundacion ta spera di yega na mas hende cu informacion corecto y pa comunidad ta mas consciente cu epilepsia ta un condicion cu por wordo comprondi.
Fundacion Epilepsia Aruba ta invita tur miembro di comunidad pa sintonisa “Bo No Ta Bo So” tur diamars, cuminsa di 4 di augustus pa 8:45 di anochi na Tele Aruba. Sea cu bo ta biba cu epilepsia, bo tin un ser keri cu epilepsia, of simplemente bo kier siña mas, e programa aki ta pa bo.
Fundacion Epilepsia Aruba kier expresa un danki special na Tele Aruba y su director Giovanni Kock, pa e oportunidad y confianza pa haci e programa aki realidad. Tambe un danki grandi na Leo Vrolijk, productor di “Bo No Ta Bo So”, y henter e team di Tele Aruba cu a traha hunto cu e fundacion durante e preparacion y grabacion di e programa.
Pa mas informacion, sigui Fundacion Epilepsia Aruba riba Facebook y Instagram. “Bo no ta bo so.”
