A traves di su iniciativa LVB-Kenniscentrum Aruba, e fundacion ta organisa un programa intensivo di capacitacion profesional cu participacion di expertonan internacional for di Hulanda.
Fundacion Siñami Paso pa Paso Aruba, activo desde 2009 den acompañamento y guia integral di mucha, hoben y nan famia, ta anuncia e organisacion di e Intensive Professional Certificate Program in Mild Intellectual Disability (LVB), cu lo tuma luga na Aruba di 16 te cu 27 di november 2026.
Desde su inicio, e fundacion ta brinda acompañamento interdisciplinario, cu e participacion di un equipo di profecional cualifica den diferente area. E equipo ta consisti di Sra. Lic. Maria Cristina Harsveld, logopedista / pedagogia infantil; Sra. Dr. Tiara Calvo, medico; Sra. Lic. Claudia Villamizar, psicologa; Sra. Yaxzully Toyo, MSc., psicologa infantil; Sra. Natalia Garcia, MSc., neuropsicologa; Sra. Stephania Espitia, MSc., psicologa clinico; y Sr. Carlos Falla, MSc. neuropedagogo.
E acercamento interdisciplinario di Fundacion Siñami Paso pa Paso Aruba ta enfoca riba comprension di e necesidadnan individual di cada persona, e identificacion y desaroyo di nan capacidad, y e fortalecemento di nan bienestar integral. Ademas, e fundacion ta promobe inclusion y participacion activa den comunidad, cu e meta di contribui na un desaroyo mas pleno y na un mihor calidad di bida pa cada persona y su famia.
Como parti di su compromiso continuo cu excelencia den atencion y desaroyo profesional, Fundacion Siñami Paso pa Paso Aruba a desaroya LVB-Kenniscentrum Aruba, un iniciativa cu ta reuni diferente profesional y organisacion pa promobe intercambio di conocimiento, investigacion y capacitacion specialisa den relacion cu persona cu discapacidad intelectual leve (LVB) y persona cu funcionamento intelectual limite.
Cu e organisacion di e Intensive Professional Certificate Program in Mild Intellectual Disability (LVB), e fundacion ta sigui fortalece su compromiso cu formacion profesional, ampliacion di conocimiento y desaroyo di competencia specialisa. E iniciativa aki ta contribui na un mihor comprension di e necesidad di e grupo meta y na e promocion di un acercamento mas inclusivo, profesional y adapta na nan necesidad.
LVB-Kenniscentrum Aruba: conocimiento, investigacion y capacitacion
LVB-Kenniscentrum Aruba tin como meta principal fortalece e conocimiento y capacidad profesional disponible na Aruba, a traves di tres area di accion:
1. Investigacion: Realisa investigacion tocante e situacion actual y necesidad di persona cu discapacidad intelectual leve na Aruba. (area Educacion, participacion social y inclusion, empleo y empleabilidad y envehecemento.
2. Desaroyo di material di apoyo: Elabora material informativo y educativo pa profesional y famia, cu atencion special na disponibilidad di informacion na papiamento.
3. Capacitacion profesional: Desaroya curso y programa di entrenamento enfoca riba tecnicanan practico y metodonan di intervencion fundamenta riba evidencia cientfico.
Cu e iniciativa aki, e fundacion ta busca crea un plataforma di colaboracion y intercambio di conocimiento, cu por contribui na un meho comprension y acompañamento di e grupo di persona aki den nos comunidad.
Un programa academico fundamenta riba evidencia cientifico
E programa intensivo di november ta representa un paso concreto den e esfuerso di LVB-Kenniscentrum Aruba pa fortalece competencia di profesionalnan den sector di educacion, salud, social y laboral.
E capacitacion ta combina conocimiento teorico, investigacion cientifico, analisis di caso y workshopnan practico, cu enfasis riba aplicacion di metodonan internacional den e contexto educativo, clinico y social di Aruba.
E meta ta pa profesionalnan por reconoce y comprende miho e necesidad especifico di un persona cu discapacidad intelectual leve, y ofrece intervencion y acompañamento adapta na nan capacidad y circunstancianan individual.
Contenido academico: temanan cu lo wordo trata
1. Introduccion na discapacidad intelectual leve y funcionamento adaptativo
Fundamentonan cientifico di discapacidad intelectual leve, evaluacion diagnostico, funcionamento adaptativo y implicacion pa educacion y acompañamento profesional.
2. Aplicacion di Metodo Yücel
Un workshop practico enfoca riba uso di Metodo Yücel den contexto profesional, incluyendo preparacion di participantenan pa usa e conocimiento aki.
3. Analisis explicativo den discapacidad intelectual
Un acercamento cu ta bay mas leu cu un diagnostico of etiqueta clinico, pa compronde e factornan cu ta influencia comportamento, funcionamento y necesidad di apoyo di cada persona.
4. Trauma y discapacidad intelectual leve
Reconocimiento di experiencia traumatico y comprension di e impacto cu trauma por tin riba comportamiento y bienestar emocional.
5. Comunicacion profesional y influencia efectivo
Desaroyo di estrategia di comunicacion constructivo y influencia positivo den relacionnan terapeutico, educativo y di acompañamento.
6. Explotacion y trafico di hende
Identificacion y comprension di riesgo di explotacion y trafico di hende cu por afecta persona cu discapacidad intelectual leve, y e implicacion pa proteccion y actuacion profesional.
7. Transicion di educacion pa empleo
Preparacion, inclusion laboral y acompañamento di hoben cu discapacidad intelectual leve den nan transicion for di sistema educativo pa mundo laboral, incluyendo e modelo Individual Placement and Support (IPS).
8. Cyberbullying y discapacidad intelectual leve
Analisis di intimidacion digital, vulnerabilidad online y e importancia di prevencion y acompañamento den contexto di Aruba.
9. Analisis di comportamento y Behavioral Skills Training
Un workshop practico di Train-the-Trainer, enfoca riba analisis di comportamento, modificacion di comportamento y desaroyo di habilidad profesional pa intervencion.
10. Mentalisacion y desaroyo socioemocional
Comprension di procesonan mental, emocionnan, relacionnan interpersonal y desaroyo socioemocional, cu atencion especial na necesidad di persona cu discapacidad intelectual leve.
Facilitadornan internacional di alto nivel academico
Un di e caracteristicanan principal di e programa ta e calidad academico y experiencia cientifico di su facilitadornan internacional, vincula na diferente universidad y institucion especialisa na Hulanda.
E programa lo ta bou di liderazgo academico di Prof. Dr. Xavier Moonen, profesor universitario y investigador especialisa den discapacidad intelectual, kende lo actua como facilitador principal y lo ta presente personalmente na Aruba pa guia e capacitacion y workshop.
E colaboracion cu Prof. Dr. Moonen tin su origen den 2024, ora cu el a dicta e prome curso online pa profesional na Aruba. Na 2025, el a bishita Aruba personalmente, unda el a haya oportunidad di conoce mas di cerca e realidad local y e necesidadnan di capacitacion den e tereno di discapacidad intelectual leve. Durante e bishita aki, el a dicta un curso intensivo di tres dia pa profesional di diferente disciplina.
Considerando e resultado positivo di e capacitacion anterior y e necesidad continuo di formacion especialisa, Prof. Dr. Moonen, den colaboracion cu Fundacion Siñami Paso pa Paso Aruba, a desaroya e programa academico di 2026. E programa aki ta representa un continuacion y ampliacion di e esfuerzo pa fortalece conocimiento cientifico y competencia profesional na Aruba.
Tambe Dr. Gabriëlle Mercera di Maastricht University, lo participa presencialmente na Aruba, compartiendo su conocimiento y experiencia cientifico tocante trauma, vulnerabilidad, explotacion y trafico di hende den relacion cu persona cu discapacidad intelectual leve.
Otro experto internacional lo contribui na e programa via online, incluyendo:
• Drs. Marca Geeraets, GZ psicologo.
• Dr. Harrie van Leeuwen, psiquiatra infantil & hubenil.
• Dr. Inge Wissink, Utrecht University.
• Dr. A. Willems, Tilburg University.
• Prof. Dr. Paula. Sterkenburg, Vrije Universiteit Amsterdam.
E combinacion di capacitacion presencial, conferencia online y workshopnan practico ta brinda profesionalnan na Aruba un oportunidad balioso pa beneficia di conocimiento cientifico internacional y relaciona esaki cu e realidad local.
Fortalecimiento di capacidad local y transferencia di conocimiento
Un componente importante di e programa ta e enfoke Train-the-Trainer, cu ta prepara profesional pa aplica y transmiti e conocimiento adkiri den nan propio organisacion y contexto laboral.
E acercamento aki ta contribui na sostenibilidad di capacitacion profesional, pasobra e conocimiento no ta keda limita na e participante di e curso, sino por sigui wordo comparti y aplica.
Pa Fundacion Siñami Paso pa Paso Aruba y e iniciativa LVB-Kenniscentrum Aruba, e meta no ta solamente organisa un serie di curso, sino contribui na un proceso continuo di investigacion, profesionalisacion, sensibilisacion y fortalecimiento di e red di apoyo na persona cu discapacidad intelectual leve y nan famia.
Informacion di e programa
Fecha: 16 te cu 27 di november 2026
Horario general: 9:00 a.m. – 1:00 p.m. (horario di sesionnan individual por varia)
Lugar: Van Leeuwenhoekstraat 2, Oranjestad, Aruba (San Pedro di Verona).
Inscripcion: Participantenan por inscribi pa cursonan individual. Cupo ta limita.
Pa mas informacion y inscripcion:
WhatsApp: +297 747 1267 Telefon: +297 568 1946
E-mail: f.s.p.p.aruba@gmail.com
