Awe dialuna Minister di Enseñansa sra. mr. Gerlien L. Croes a haya un ehemplar di e buki pa mucha di Festival di buki pa mucha 2026 for di señora Astrid Britten, directora di Biblioteca Nacional Aruba. Sra. Astrid Britten a entrega e buki den compania di coleganan Zetsia Ponson y Valerie Figaroa.
Alia ta cla pa su presentacion riba stage di Cas di Cultura. Luca ta para hunto cu Alia tras di cortina. Di ripiente Alia ta bira masha nervioso mes pa subi stage! Ay dios! Ta con awo? Net e momento ey ‘Rashi Curashi’ ta aparece. Ken esey ta? Y kico e ta haci? Esaki ta un storia di dos hoben cu ta prepara pa presenta un musical hunto cu otro mucha.
E aña aki e regalo di e Festival di buki pa mucha ta un buki di prenchi cu e titulo “Rashi Curashi ta haya curashi!”, skirbi door di e escritor Arubiano Daylan Krozendijk, docente di drama na Instuto Pedagogico Arubano (IPA) y ilustra pa illustrado Hulandes Petra Heezen. E tema actual di e Festival di buki pa mucha ta “Spot aan!”, traduci na Papiamento como “Luz, Camara, Accion!”. E apertura oficial di e festival di buki pa mucha, edicion 34 ta tuma lugar diabierna dia 30 di oktober 2026 na Biblioteca Nacional Aruba den cura di Dept. Arubiana na Bachstraat # 5 y ta cuminsa 6or di atardi. Tur mucha ta bon bini!
