Diamars mainta, Prome Minister mr. Mike Eman, hunto cu Minister di Finansa mr. Geoffrey Wever, a presenta oficialmente e proyecto di arte publico “Soldachi” na Plaza Comercio, situa den Columbusstraat. E sculptura, diseña pa artista local Nigel Matthew y Ciro Abath, lo ta realiza den brons y lo tin un nificacion unico cu ta rindi homenahe na historia y resistencia di e comunidad di e area di Lagoen.
Pa Prome Minister Eman y Minister Wever, e momento aki tin un balor personal y profundo. Ambos tabata alumno di tanto meneer Matthew como meneer Abath durante nan tempo na scol, un laso cu pa nan ta confirma e poder di educacion y arte den formacion di lider di futuro.
“Soldachi” ta mas cu un sculptura; e ta un simbolo di persistencia y identidad pa tur esnan cu ta conecta cu e area di Lagoen. E soldachi ta sali pa traha, pero den momentonan di reto y cansancio, ta busca refugio bek den nan cas, pa despues surpasa tempestad. Esaki ta un comparacion di bida real di hopi comerciante y famia den nos comunidad.
Plaza Comercio no ta solamente honra e mundo comercial, sino ta un simbolo di continuidad. Segun Prome Minister Mike Eman, den gobernacion tambe, continuidad ta clave. Vision y idealnan grandi no por ta limita na un solo termino di gobernacion. Pa logra transformacion real, mester tin boluntad politico pa sigui cu plannan cu tin impacto positivo pa pueblo.
Prome Minister Eman a subraya cu apesar cu e gobierno anterior no a sigui cu e plan di revitalisacion di nos centro di ciudad, Minister Wever, como parti di e gobierno anterior, si a mira e balor historico y cultural di e proyecto, y a continua cu inversion pa mehora e zona durante su periodo anterior como minister. Esaki ta un prueba cla cu ora un ideal ta bon pa Aruba, color politico no mester ta un obstaculo.
Ciro Abath, co-creador di e sculptura, a splica cu e fase actual ta inclui e creacion di un modelo di tamaño “1 op 1” cu ainda mester traha den polyester na Hulanda. Despues, lo basha e diferente elementonan den brons y las esakinan na otro. E sculptura final lo ta entre 1.60 y 1.80 meter.
Gobierno di Aruba, bao di liderazgo di Gabinete AVP-Futuro, ta compromete pa sigui inverti den arte, historia y identidad nacional. “Soldachi” ta un ehempel di con arte por fortalece nos memoria colectivo y uni nos comunidad den un solo vision pa futuro.
