ORANJESTAD – Diaranzon mainta durante conferencia di prensa, Minister di Energia Glenbert Croes a anuncia cu e compania multi-nacional Acciona Energia di Spaña, lo bin Aruba pa asesora y conseha Gobierno di Aruba riba e desaroyo di e Aruba Hydrogen Valley. E delegacion encarga, lo ta biahando pa Aruba despues di semana santa, pa inicia cu e preparacionnan pa cu e proyecto aki.
Pa Gobierno di Aruba, e decision pa a indentifica Acciona Energia como e compania encarga cu e desaroyo di e proyecto grandi aki, sigur ta un motibo pa celebra. E compania multi-nacional, ta uno renombra y di credibilidad halto, cual pa Aruba tabata un factor determinante den e proceso di seleccion.
Minister Croes a expresa cu Aruba ta un isla ta bendiciona cu su rikesanan natural cu ta e lama, solo y biento, cu ta factornan necesario pa produci “green hydrogen” pa e futuro desaroyo di nos pais. Aruba lo ta e prome pais den region pa tin un “hydrogen valley” y lo ofrece e oportunidad pa suministra esaki pa otro islanan den region y talbes hasta Europa.
E mandatario a indica cu e desaroyo di e Aruba Hydrogen Valley lo tin un impacto grandi riba e economia di pais Aruba. E proyecto aki lo crea cupo di trabou, trabou pa contratistanan, lo produci un “spin off” economico pa San Nicolas, pa Aruba y lo genera mas entrada pa e caha di gobierno.
“Mi ta gradici e delegacion cu a compaña mi durante full e trayecto aki y a sostene e idea di Gobierno pa comberti pais Aruba den e prome isla den region pa tin un Aruba Hydrogen Valley. Ta danki na boso sosten y sosten di henter e comunidad, cu pronto e proyecto importante aki lo bira un realidad”, Minister Croes a expresa.
