Solo di Pueblo ta sigui di cerca e desaroyo escandaloso di Aeropuerto di Aruba, caminda e gobierno nobo di AVP-Futuro ta traha haciendo tur nan esfuerso pa regala nos aeropuerto n’e compania Hulandes Schiphol Group.
Den e desaroyo nobo aki, a bira conoci cu e compania Schiphol ta exigi cu nan director (un hende di exterior, no Arubiano) mester ricibi un salario di 60,000 florin pa luna. Algun siman pasa durante un rueda di prensa, Minister Geoffrey Wever a bisa abiertamente cu e mes ta bay tuma e encargo pa yuda e proceso y duna e director e suma aki sin problema.
E desicion aki ta un cos hopi straño, pasobra nos tin un ley di salario maximo na Aruba, pa preveni exceso y privilegio. Pero awo, ta parce cu gobierno di AVP-Futuro ta kita e regla, no pa paga nos hendenan, sino pa un director di exterior. Mientrastanto, e otro directornan Arubiano cu ta dirigi e empresanan publico y fundacionnan, no ta ricibi ni mita di esaki, y niun tiki di e trato preferencial.
Ta cla cu e gobierno di AVP-Futuro no ta kere den nos ley, ni ta defende e interes di pueblo, basta cu nan logra e meta pa bende y regala nos aeropuerto na Schiphol Group.
Solo di Pueblo ta sigui esaki di cerca y lo sigui informa pueblo cu e berdad!
