Prome minister mr. Mike Eman, hunto cu minister mr. Gerlien Croes, y minister plenipotenciario di Aruba, mr. Mildred Schwengle, a forma parti diaranson di un reunion cu secretario di estado Eric van der Burg den cuadro pa fortalece e cooperacion entre Aruba y Hulanda.
Durante e encuentro, a revisa e diferente tema cu a discuti anteriormente durante e bishita di ex-prome minister Dick Schoof aña pasa na Aruba y siman di prome minister Rob Jetten. Gabinete AVP-Futuro a enfatisa importancia di sigui construyendo rib’e entendimentonan y acuerdonan alcansa entre ambos pais. Prome Minister Eman a expresa su aprecio p’e interes cu secretario di estado Van der Burg ta mustra den e desaroyo sostenibel di Aruba y den fortalecemento di e relacionnan dentro di Reino.
“Nos a sinti claramente cu tin hopi compromiso y interes den e progreso di Aruba. Pa nos ta importante cu e acuerdonan cu nos a logra no keda solamente riba papel, sino pa ehecutanan cu apoyo concreto y colaboracion entre diferente instancia, Prome Minister Mike Eman a declara. Un di e temanan central durante e reunion tabata pa haci siguimiento di e Memorandum of Understanding (MoU) firma recientemente cu diferente partnernan strategico. Segun Prome Minister Eman, e MoU ta representa un punto di salida importante pa habri varios oportunidad nobo, incluyendo acceso y cooperacion cu Europa. Gobierno di Aruba a enfatisa cu e siguiente paso awor ta ehecucion y coordinacion efectivo entre diferente partnernan institucional y gubernamental pa realisa e metanan aki.
Durante e reunion tambe a informa secretario di estado Van der Burg tocante e siguiente fase di desaroyo p’e area di refineria. Na Hulanda diaranson e delegacion di Gobierno di Aruba lo tin un reunion importante cu Ministerio di Asunto Economico Hulandes tocante un trayecto caminda tres specialista lo ta na disposicion pa yuda Aruba den e proceso di desaroyo di e area strategico aki.
E trayecto ta enfoca riba limpiesa, desmantelacion di structura industrial cu no tin uzo ni siguridad operacional y creacion di oportunidad economico nobo pa asina por habri caminda pa realisa varios inversion sostenibel y diversificacion economico. “Nos ta creando oportunidad pa transforma un area cu hopi balor strategico den un motor economico moderno y sostenibel pa futuro di Aruba”, Prome Minister Eman a comenta.
Gobierno di Aruba ta mira cu optimismo e colaboracion continuo cu Hulanda y ta considera e dialogonan constructivo aki como un paso importante den fortalecemento di cooperacion dentro di Reino Hulandes.
