Despues di mei anochi, polis a topa cu un situacion sospechoso na un cas na Mahuma, cerca di Joanne Bar, y a dicidi di baha pa controla.

Polis a keda sorprendi pa loke nan a mira.

Un fiesta andando den tdq y den pandemia unda tur protocol tabata wordo viola. Muziek tabata bati y alcohol tabata lora y muhernan bailando y gosando. Un cantidad di personanan hoben tabata presente den gozadera formal.

Ora e grupo a nota cu nan a wordo gara, nan a purba core den tur direccion, pero sin exito.

Polis a transporta tur pa warda unda a bay atende cu nan pa traha nan boet. Ta trata di mas di 20 detencion unda hopi tabata hende muher, pero tambe hende homber.

Segun SOLO DI PUEBLO a skirbi ayera den un informe, cu tin problema den Crisisteam, pasobra polis ta traha, pero OM ta lepia.

OM no ta persigui esnan cu wordo haya riba caya ta celebra den tdq. Kico esey a ocaciona? Mas fiesta clandestino, y mas contagio.

Cu e fiesta aki na Mahuma, nos por conclui cu hopi no tin e precupacion mas cu e virus y esaki lo por causa cu contagionan lo bay subi mucho mas na Aruba.