Federacion Arubano di Futbol (AVB) ta cla pa un di e momentonan mas emocional di e temporada den futbol base. Diasabra awor, 9 di mei 2026, e talentonan hoben di e categoria U-9 (Baby) Categoria Plata lo topa den un bataya deportivo pa dicidi ken lo hiba e corona di campeon pa cas.
E gran final aki lo tuma luga pa 8:30 AM den e Centro Deportivo Guillermo Prospero Trinidad (C.D.G.T.) na Dakota, caminda e ekiponan di S.V. Bubali y S.V. RCA1 lo midi forsa riba tereno.
Un ceremonia di altura
Pa duna e importancia cu e finalistanan aki merece, e inicio di e partido lo wordo compaña pa e salida oficial di e hungadonan bou di e notanan di e Himno di FIFA, sigui pa nos himno nacional, Aruba Dushi Tera. AVB a confirma cu lo tin un fotografo oficial presente pa capta tur e accionnan riba tereno y e momento magico di e ceremonia di premiacion.
Reglanan y Logistica pa e partido
Pa garantisa un bon spectaculo y orden riba tereno, AVB a stipula algun punto clave:
- Warming-up: Ta pidi entrenadornan pa cuminsa trempan pa asina respeta e orario di inicio (8:30 AM).
- Fanaticada: E siguidonan di ambos ekipo lo haci uzo di e tribuna parti pariba (e seccion sin dak), caminda e porta lo habri un ora prome cu e wega.
- Ubicacion: E wega lo wordo hunga na e banda drechi di e tereno (mirando for di parti pariba).
- Personal riba banki: Cada organisacion tin un maximo di 5 persona adulto autorisa riba banki.
- Definicion: Si e partido keda empata despues di e tempo reglamentario, lo pasa mesora pa e tanda di penalty (5 pa cada ekipo) te ora tin un ganador.
Recompensando e esfuerso
Independientemente di e resultado, e esfuerso di e muchanan lo wordo reconoci. AVB lo otorga un total di 25 medaya y un copa pa tanto e ekipo Campeon como e Sub-campeon. E organisacion ta desea ambos club e miho exito den e gran final aki, resaltando e balornan di deporte y compañerismo.
Ta invita henter e comunidad di futbol pa bin apoya nos futuro streanan den e final emocionante aki!
