E TA BON OF E NO TA BON?
Gremionan sindical, comercial y politiconan di AVP y Futuro tabata invita pa un presentacion di gobierno di Aruba diahuebs ultimo den Embassy Suites.
Tabata e prome biaha cu gobierno lo a papia tocante e ley di reino HOFA cu nan a aproba dia 13 di augustus, mas di dos luna pasa, y cu Hulanda a aproba dia 29 di augustus den Conseho di Minister di Reino.
Apesar di hopi presion di den comunidad, gobierno di AVPFuturo a nenga di duna informacion.
Ora gremionan porfin a haya e invitacion, expectativanan tabata halto.
Sinembargo e encuentro tabata un decepcion. A haya cierto informacion, pero e tabata mas bien un blame game.
En bes cu e gobierno “own” loke nan a acorda cu Hulanda, nan a bringa esun cu segun nan a yega ma e acuerdo cu Hulanda.
Prome Minister Eman na un banda a elogia e acuerdo cu su predesor ex Prome Minister Evelyn Wever-Croes a yega na dje aña pasa. Pero un rato despues a bisa cu e mester a acepta loke a wordo firma sino nos por entre otro perde nos paspoort.
Pues e pregunta di gremionan ta keda: bo mes ta para pa loke bo a presenta na Hulanda dia 13 di augustus 2025, of bo ta obliga di tum’e pasobra bo predesor a firma un acuerdo?
Loke ex Prome Minister a firma, tabata bon of e tabata malo?
Principalmente gremionan a keda confundi pasobra e tres ministernan presente Eman, Croes y Wever, no tabata mustra sincero. Eman a purba hinca miedo den hende cu Aruba lo perde e paspoort hulandes, un argumento hopi absurdo. Pregunta ta si dia di welga di hamber na 2014 ela corda riba esey. Croes tabata bruha, e no ta compronde dicon oposicion ta opone, pero e mes no a splica tampoco kiko e ta para p’e. Ela enfoca riba e beneficionan pero no a menciona e desventahanan.
Wever kier a djis impresiona hende, mirando cu Eman no ta conta cu ningun credibilidad riba e tereno aki, Wever a purba bai cu e credibilidad ey.
Tur tres a mustra visiblemente nervioso, sin argumento y sin cu a toca e desventahanan di e ley di reino.
Locual gremionan a haya falta di dje tambe ta documentonan, algo cu nan a haya si di parti di oposicion. Ley HOFA, ley local, conseho di Raad van Staten, evaluacion di Algemene Rekenkamer, consehonan di diferente profesor den ley constitucional.
Gremionan a keda confundi, y mester bisa cu gobierno no a logra kita for di mesa e impresion cu e consequencianan negativo di e ley di reino HOFA pa Aruba ta mas grandi cu esunnan positivo.
