ORANJESTAD – E situacion interno di e partido berde, no ta cos di “canta macamba”‘. Asina fuentenan bon na altura a asegura SOLO DI PUEBLO recientemente. E desgusto interno ta hopi hopi grandi, y mas grandi di loke hopi ta pensa.
Un cantidad grandi di candidatonan di AVP no ta aproba e forma cu Mike Eman a lidera e partido y a pone Benny riba lista, asabiendo di e acusacionnan di sospecho grave cu e tin ta colgando riba su cabes.
Hopi ta puntra nan mes: Dicon Mike Eman a defende Benny asina tanto? Dicon no por a kies pe direccion corecto, pa lage bay limpia su nomber, dje bolbe bek?
Hopi otro politiconan di AVP ta desapunta y tur dia nan mester lidia cu e rechaso di e propio votadornan cu a bira lomba pa e partido.
Mas grave ta ora cu Abogado David Kock a bin admiti publicamente, cu tin cosnan malo cu a sosode. Esaki ta cay manera baño di awa friu cerca miembrecia di AVP, pasobra, keto bay Benny tabata grita cu ta persecucion politico. Hopi den AVP a kere cu Benny ta wordo hinca den algo cu e no a comete. Pero ora cu David Kock a haci un declaracion, cu tin cosnan cu a sosode cu tabata robes, y cu ta esnan rond di Benny a mal usa su confiansa, e declaracionnan ey a cay den mal tera, pasobra hopi hende ta considera cu Benny tabata gaña riba su inocencia.
Ora cu Benny a sali for di KIA, tambe el’a grita, cu e caminda ta largo, e lucha ta duro, unda e mester bay proba, tur loke cu el’a wordo confronta su mes cune.
Mas leu, Benny kier sconde tambe, pasobra, e mes ta bisa cu e mester bay check cu su abogado, kico e mag di papia. Esey no tabata e Benny fuerte cu tabata grita prome cu el”a cay cera. Es decir, den KIA nan a confronta Benny cu pruebanan contundente y awor e lo mester bay pensa kico pa gaña pa saca su curpa.
Pues, ta realmente un decepcion den Partido AVP y tin indicacion cu tin un grupo ta moviendo pa asina bula afor y hasta tin papia cu mester lanta un AVP-2, cu e mes un ideologia di AVP, pero sin corupcion.
Gabinete di Mike Eman ta bay den historia unda ya caba tin dos minister envolvi den corupcion y ainda falta dos mas, cual nan caso tambe pronto lo sali na cla: De Meza y Arendsz den RDA, kendenan tambe a haci cosnan masha robes mes.
