Hefe grandi di aduana tabata laga droga pasa na airport
WILLEMSTAD- Recientemente a tuma lugar un caso den corte di Curacao, unda a bin sali na cla, cu un traficador di droga a cumpra un hefe grandi di aduana na Curacao, pa asina segura cu un mula por pasa trankil cu e droga den maleta na airport di Hato. Ta trata di 22 kilo di Cocaina cu e hefe grandi Engelhardt kier a laga pasa.
Tabata dia 21 di april 2022 cu e traficacion mester a tuma lugar, ora cu e hefe a yega na e scanner machine y a pidi e empleado pa lanta, den un forma masha fresco, pasobra su mes lo bay sinta tras di e scanner.
Unaves cu e tabata tras di e scanner, el’a wassap e cabesante pa laga e mula drenta awor. E cabesante a manda e hefe e potret di e mula y su esposa via wasap y asina e hefe por a reconoce e mula.
Unabes e mula a pasa su maleta, e hefe a laga e maleta pasa den e scanner. Sinembargo e trahador cu no a confia e cos, a signala cos straño den maleta y a yama atencion di e hefe. E hefe mes a lanta di e scanner y bay na e maleta, a check e maleta y a bisa cu ta buki nan ta.
Dor cu tabatin mas controlador na final di e mesa, un otro a bay pa controla un otro maleta di e mes mula, y eynan a bin encontra droga.
Segun e hefe grandi di aduana a bisa, despues el’a hiba su celular drecha pa asina nan delete tur comunicacion y informacion cu e tabatin den e telefon.
E caso a keda presenta dilanti corte unda awor e hefe grandi mester para responsabel pa su acto, cual ta un delito serio di su banda, unda no solamente e lo perde su trabao, pero tambe lo mester sinta castigo.
