Hesus ta puntra: ”Cu kico lo Mi compara reino di Dios?” El a uza dos ehempel: e simia di mosterd y e zuurdeeg. Notabel ta cu tur dos ta cosnan cu ta cuminsa chikito pero cu ta bira hopi mas grandi. E simia ta crece bira un palo di mata y e zuurdeeg ta plama den e mansa pone reis. Tin biaha nos tin miedo y duda pa tuma cierto pasonan. Nos ta kere cu nos ta mucho chikito, mucho simpel y cu nos no ta suficiente pa logra cosnan grandi. Berdad ta cu nos no por logra cosnan grandi riba nos mes! Pero si ora nos pone nos metanan den man di Dios, E por haci cosnan grandi pa nos. Tur cos ta cuminsa na stapnan chikito: un oracion chikito, un gesto di bondad, un decision pa pordona un ruman, curashi pa kere den Dios. Pasobra loke ta mustra mas insignificante pa nos, por tin e proposito di mas grandi den e plan di Dios.
Oracion: Señor, fortalece mi Fe. Guia mi pasonan y siña mi kere cu Abo por haci cosnan grandi, for di comiensonan chikito. Mi ta confia cu Bo ta trahando hasta na momentonan cu ta keto. Ora cu mi ta sinti mi zwak y ta sinti cu mi no tin hopi pa ofrece, laga mi corda riba e simia di mosterd. Amen.
