E tabatin cantidad di arma entre otro un mini Uzie Homber envolvi den preparacion di asesinato condena na 10 aña di prison
Segun nos por a compronde cu Hof ta haya M.T. culpable di a yuda prepara un asesinato na Aruba, caminda el a wordo haya cu un cantidad di arma y droga. Hof a confirma e castigo di 10 aña di prison.
E caso aki ta di 2020 caminda na October 2020 tabatin sentencia contra M.T. y e sicario cu a wordo busca pa haci e asesinato. Ta asina cu e sicario a wordo hiba Bonaire pa motibonan di seguridad. Fiscal a mustra cu accion di biaha di Recherche a pone cu e asesinato planea riba e homber K.R. no a sosode. Na e cas unda M.T. tabata, a haya un Uzi y tres arma di candela. Promer a detene e sicario, kende Recherche tabata scucha su combersacionnan. L.P.O. lo a wordo ofreci 5 mil Euro pa mata K.R. y cu e lo haci haya armanan for di M.T. y un auto. E sicario lo a papia cu e cabezante di un organizacion poderoso den Caribe, kende ta bibando na Hulanda.
Recherche a haya den e cellular di e sicario, mensahenan whatsapp cu M.T., kende ta e intermediador y tabatin e armanan na Madiki. Den un cas container, Arestatie Team a haci investigacion y a detene M.T. y a confisca un mini Uzie MAC, un revolver Ranger MR Cal. 38 Special, un pistol Glock 26 y un pistool 9 mm. Tambe a haya un cantidad di droga y placa.
Na October 2020 Hues a haya legalmente proba cu tabatin un preparacion pa asesinato di e homber K.R. Hues a mustra cu no ta tolera delitonan asina na Aruba.
Pa cu M.T., Hues ta haya legalmente proba cu e tabata e persona di contacto y cu e tabatin un Uzi y tres ora arma na su cas, mas un cantidad di 500 pilder di XTC, 1 kilo di cocaina y 3.5 kilo di marihuana. Hues ta haya e castigo exigi pa Fiscal na su lugar y ta condena M.T. na 10 aña di prison. Hues a ordena pa destrui e droganan y saca e armanan for di circulacion.
Pa cu L.P.O., Hues ta haya legalmente proba cu el a wordo acerca pa mata un persona y cu el a accepta pa haci esaki. Hues a baha e castigo un poco pa L.P.O. y a conden’e na 6 aña di prison.
Hof ta haya legalmente proba cu M.T. tabata e intermediador entre e sicario L.P.O. encarcela na Bonaire y e cabezante di e organizacion poderoso na Hulanda.
Hof a confirma e sentencia di Corte den Promer Instancia y a condena M.T. na 10 aña di prison, kitando e tempo cu e ta sera den KIA.
