ORANJESTAD – Diabierna den Corte di Husticio, Hues a dicta sentencia den e caso penal cu Ministerio Publico a cuminsa contra e homber Venezolano R. (59). Hues a declara R. liber pasobra no tin prueba di sosten.
SOLO DI PUEBLO por a compronde cu R. a declara cu e tabatin relacion sexual 1 biaha so cu e dama B. pero e no a viol’e. Fiscal si ta haya R. culpabel y a exigi 4 aña di prison. Hues a declara R. liber.
FISCAL A EXIGI 4 AÑA DI PRISON
Luna pasa Fiscal a bisa cu den caso di violacion mester busca prueba di sosten. El a mustra cu tin declaracion di e dama S., kende a bisa cu ta e dama B. a yam’e y na yoramento a cont’e cu R. a viol’e. Tambe tin declaracion di e dama M. Tambe Fiscal a mustra cu tin raport di Instituto Forence di Hulanda (NFI) cu ta mustra cu B. a wordo penetra door di R. Fiscal a bisa cu e no ta kere declaracion di R., cu e tabatin relacion sexual 1 biaha cu B. y esey tabata voluntario. Fiscal a remarca cu ta den Corte, R. a bisa esey. Fiscal no ta haya suficiente prueba cu R. a horta placa for di B. cu violencia. El a bisa cu B. a splica pakico el a para e auto banda di Piet. Ta hechonan serio. E dama B. a accepta invitacion di e ruman di Iglesia pa bay su cas pa bebe juice. Fiscal a exigi 4 aña di prison pa R.
ABOGADO
Mr. Illes a bisa Hues cu e ta comparti punto di bista di Fiscal cu no por bisa cu R. a horta placa cu violencia di e dama B. y pa declar’e liber. Segun e abogado, e mesun cos ta influencia e otro acusacionnan. El a bisa cu R. ta nenga tur cos. E abogado a bisa cu NFI ta bisa cu tabatin relacion sexual pero nada otro. E abogado a bisa cu e comportacion di B. no ta cuadra cu un hende cu a wordo viola. E no a bay Polis di biaha. E abogado a remarca pakico e dama B. ta para su auto te banda di Piet siendo e tin cu bay banda di hotel. E ta mustra mas cu e auto ta para den vecindario di cas di R. E abogado ta haya cu prueba di sosten mester busca tambe na e paña di e dama y esey no a sosode. El a remarca, unda e carson di abou kibra y paña kibra di e dama ta. Si ta papia cu e dama a perde conocemento, unda a mira marca di sla na su cabez. E abogado ta haya cu falta di mas investigacion pa determina detayes di e caso. E ta haya cu e caso aki no tin sentido. E abogado ta haya cu mester duda den e caso y declara R. liber.
SOSPECHOSO DECLARA LIBER
Hues den su sentencia a bisa cu e ta haya e declaracion di e victima, confiabel. No tin motibo pa duda. E dama B. a bisa cu R. a viol’e, tene relacion sexual cun’e contra su voluntad. E tabata for di tino ora esey a sosode. Hues a bisa cu R. a admiti di tabatin 1 biaha relacion cu e dama B. Esey tabata despues cu a haya resultado DNA di Hulanda cu ta mustra cu R. tabatin relacion sexual cu B.
Hues a bisa cu mester busca prueba di sosten. E dama B. a bisa cu A. a dal’e duro na cabez, caminda el a perde conocimento y R. a ranca su carson di abao. El a bay for di cas cu su shimis pero e carson di abao el a laga atras. Hues a mustra cu ora Polis a papia cu B., nan no a mira ningun marca na garganta di maltrato. No tin relato di dokter cu ta mustra cu B. a sufri sla. No tin potret di marca di maltrato. No tin investigacion haci na paña di B. pa determina si realmente tabatin violacion. Hues a sigui bisa cu e mesun anochi e dama B. a yama amiga cu el a wordo viola. E amiga no a bisa cu B. tabata emociona. Su siguiente dia B. no a bay Polis sino a bay traha. Despues el a bay na trabao di R. pa bisa kico a pasa cun’e. Su siguiente dia e no a bay Polis tampoco. Hues a conclui cu no tin suficiente prueba di sosten. Hues a declara A. liber.
