Palm Beach: Dialuna den careda di 1’or di marduga na King David Suites a yega un homber gritando y pidiendo auxilio. E homber aki tabata herida cu un corta basta profundo na su man cu tabata sangrando bastante.
E guestnan cu tabata hospedando na e compleho aki, a spanta y mesora nan a bati alarma. Varios unidad di polis a yega hopi liher na e sitio. Enberdad nan a bin topa cu e homber aki herida y tabata sangrando bastante na su man. Polis na su turno a pidi pa presencia di ambulance cu hopi urgencia. E homber herida tabata mustra bou influencia tambe. E agentenan na e sitio a trata na pone pression riba e corta pa asina evita cu e lo sigui sangra hopi.
Personal di ambulance a presenta y a trat’e na e sitio. Despues di un rato mirando den e estado cu e homber tabata encontra su mes, e paramediconan di ambulance a dicidi di transport’e pa hospital pa un tratamento medico mas avansa.
E polisnan na e sitio a pidi pa presencia di departamento tecnico di polis pa haci mas investigacion. Polis a tuma declaracion di tur persona cu lo tabata testigo di locual lo a sosode.
