Hues a baha hopi e castigo cu Fiscal a exigi den e caso penal contra e homber Eugene Lacle (24).
SOLO DI PUEBLO por a compronde cu Fiscal a exigi 4 aña di prison pero Hues no ta haya proba cu Lacle a core irresponsabel manera Fiscal ta haya y pesey a baha e castigo drastico.
FISCAL A EXIGI 4 AÑA
Luna pasa, tratamento di e caso a tuma lugar caminda Fiscal a mustra cu Lacle tabata core sin rijbewijs, e tabata core mas duro cu borchi ta mustra, e tabata core bou influencia di alcohol. Fiscal a sigui bisa cu Lacle tabata core un Nissan March right hand y a bay pasa un truck mientras un motorcycle tabata bin den direccion contrario.
Na opinion di Fiscal, tur esaki ta mustra cu Lacle a core irresponsabel y door di su culpa a causa morto di Hernandez Pinedo.
Fiscal a exigi 4 aña di prison y cu Lacle no por core auto pa 5 aña. E demanda di e mama di e victima pa daño, Fiscal a aproba 17557 florin. El a pidi pa declara e otro demandanan di daño no admisibel y cu por bay cuminsa caso civil. Fiscal a bisa cu e ta kere sin duda cu tin daño inmaterial, daño psychico pero ley ta exigi cu mester hustifica e demanda cu raport di psycologo. Fiscal a pidi pa declara e demanda inmaterial no admisibel. Pa loke ta e pareha di e victima cu e damanda pa paga e proceso cu a cana pa e tata keda reonoci como tata di yiu y otro gastonan Fiscal a bisa cu mester declara nan no admisibel. Na opinion di Fiscal, no por trata e asunto di alimentacion di yiu te cu 18 aña. Esey mester bay caso civil.
SENTENCIA
Via video conference Hues a dicta sentencia. Hues tabata den sala di Corte di Husticia, hunto cu Fiscal, abogado y famianan di e victima. E acusado Lacle tabata den un oficina na KIA. Hues a bay hopi detaya den su sentencia. El a bisa cu ta legalmente proba cu Lacle no tin rijbewijs y dia 18 Maart 2024, e tabata core un Nissan March y na Savaneta a bay pasa un truck su dilanti. Door di esey, el a bay dal frontal den motorcycle cu consecuencia cu Hernandez Pinedo a fayece.
NO A CORE IRRESPONSABEL
Hues a bisa cu Fiscal ta haya cu Lacle tabata core cu velocidad halto, un forma di pusta. Fiscal ta haya cu Lacle tabata core irresponsabel. Hues ta haya cu segun ley ta castigabel ora causa accidente mortal. E pregunta ta si ta culpa di Lacle. Hues ta haya cu Lacle a core bao influencia di alcohol y core demasiado duro. Investigacion a mustra cu Lacle tabata core 115 km y a pasa e truck. Sinembargo Hues ta haya cu no por saca afor cu Lacle lo tabata pusta. Na opinion di Hues, no tin suficiente prueba cu Lacle tabata core irresponsabel.
BAHA CASTIGO HOPI
Hues a bisa cu door di Lacle su culpa y no intencional, a causa e accidente mortal. Pa cu e castigo, Hues a bisa cu e ta tene cuenta cu e seriedad di e hecho y cu Lacle a mustra duele cu loke a pasa. Hues a bisa cu pa resto di Lacle su bida e lo keda afecta pasobra Lacle conoce e victima. Hues a bisa cu door cu no prueba cu Lacle a core irresponsabel no por confirma e exigencia di Fiscal
Hues a condena Lacle na castigo 12 luna di prison, di cual 3 luna ta condicional cu 2 aña di prueba. Hues a bisa cu esey ta nifica cu e luna aki mes, December 2024, Lacle lo sali liber. Hues a sigui cu pa 2 aña, Lacle ta prohibi pa core auto. Hues a aproba 10 mil florin di daño y a stipula medida di pago. Tambe Hues a aproba 3 mil florin pa e pareha T. di e victima cu medida di pago. Esey ta nifica cu si Lacle no paga, e lo mester bay sera den KIA.
A RECHAZA HOPI DEMANDA
Pa loke ta demandanan di daño, Hues a bisa cu e ta aproba pa e mama di e victima, 17 mil florin y resto di e demandanano ta keda declara no admisibel y lo por haci un caso civil. Esun di e pareha T., Hues a aproba 3 mil florin y resto no admisibel.
Hues a bisa cu no tin ningun duda cu tin hopi dolor y tristeza pa e morto tragico di e victima, pero segun ley, e daño psychico y afecto no por wordo paga. E pareha T., Hues a rechaza e demanda di gastonan den futuro y e parti psychico y afecto. Pa loke ta demanda di e dama T. pa gastonan di entiero, ta wordo honra. Hues a aproba algo mas di 10 mil florin. Pa loke ta e demanda di e dama T. cu ta algo mas di 80 mil florin, Hues a rechaza gran parti di demanda pasobra den caso penal no por determina alimentacion di e yiu. Hues a bisa cu T. por haci un caso civil.
