Den Isaias 43:18-19 Señor ta papia cla cu nos pa no recorda riba cosnan di pasado, esey ta nifica laga pasado bay.
Pasobra Dios ta bay haci cosnan nobo, nos no tin derechi di castiga ningun hende, ni tampo keda sin pordona, tampoco tuma vengansa, pasobra esey ta causa daño na nos mes, personalmente, fisicamente, spiritualmente y socialmente.
Hopi famia ta kibra pa motibo di falta di pordon, hopi mucha ta traumatisa pa motibo cu nan mayornan no kier pordona otro, pa asina nan cu ta mucha por biba bon cu tur dos nan mayornan.
E ta parce un wega, y hopi hende ta broma cune, sin tene cuenta cu falta di pordon ta hiba na amargura, y esey ta presenta na e momentonan cu bo no ta kere.
Si Dios ta bisa den Su palabra pa nos pordona, ta pasobra Dios sa cu ora nos no ta pordona, satanas ta cohe ventaha den nos bida, y trece carga innecesario riba nos, causando daño na nos consenshi, cual tambe ta pone nos salud mental na peliger.
Bijbel ta splica bon cla den Mateo 18:35 kico Dios Tata cu ta den cielo ta haci cu hende cu no kier pordona di nan curason, pero nos tin cu tene cuenta cu esaki no ta asunto di placa so, pero den tur aspecto di nos bida, nos mester pordona.
Pasobra si nos no pordona e peso di falta di pordon ta keda riba nos henter nos bida y esey ta haci daño na nos y tin biaha hasta na nos futuro generacion.
Hopi biaha bo ta haña hende ta venga nan propio famia, pa cosnan di hopi tempo pasa , pasobra amargura ta contaminoso.
Hesus ta bisa den Mateo 18:35 : Asina tambe Mi Tata celestial lo haci cu boso,si cada un di boso, no pordona su ruman di henter su curason.
E ta y ta keda un advertencia serio pa nos, y no ta cos di haci wega cune, por ehempel awendia un tata y un mama no ta bon cu otro e yuinan ta sufri, pa motibo di e rabia /falta di pordon y amargura cu ta biba entre nan dos.
Bo ta imagina bo con un homber no ta cria su yuinan pasobra e no ta bon cu nan mama?
Kico e pober muchanan tin falta den e bagamunderia cu nan mayornan ta biba aden?
Laga tur amargura,furia, rabia,griteria,y calumnia,wordo kita for di boso,hunto cu tur malicia. Y sea cariñoso cu otro, misericordioso,pordonando otro,mescos cu Dios den Cristo tambe a pordona boso.( Efesionan 4:31-32).
Ora nos ta balora nos famia, nos ta mira cu pordon ta esencial, den nos bida, pasobra ora nos laga falta di pordon domina, nos ta keda atras, nos no por gosa di pas y trankilidad berdadero pasobra e falta di pordon ta sera e porta familiar pa otro, y asina e union lo no prevalece den nos cas manera e palabra di Dios ta ordena den Salmo 133.
Hasta den nos oracion falta di pordon ta hunga un rol hopi grandi pasobra e palabra di Dios ta bisa den Marco 11:25 : Ki ora cu boso ta para haci oracion, pordona si boso tin algo contra algun hende,pa boso Tata cu ta den cielo, tambe pordona boso, boso transgreshonnan , Ma si boso no pordona, boso Tata cu ta den cielo tampoco lo pordona boso trangreshonnan.
Hopi hende ta risca nan salud, yenando nan curason cu rabia, falta di pordon y amagrura.
Palabra di Dios ta bisa: Aspira pa tin pas cu tur hende y santificacion, sin cual ningun hende lo mira Señor.
Sinceramente, Pastor Marcel Balootje
