Diaranson mainta Hues a trata e caso penal cu Ministerio Publico a cuminsa contra e homber S.T., acusa pa intento di mata y intento di maltrato severo.
SOLO DI PUEBLO por a compronde cu Hues no ta haya legalmente proba cu S.T. a purba di mata y tampoco maltrato. Hues a condena S.T. pa maltrato cu herida.
PELEA NA PARADA DI LUZ
Fiscal ta acusa S.T. di intento di mata riba 8 Februari 2026 di e homber G. Fiscal a bisa cu S.T. lo a hinca G. cu algo skerpi. Fiscal a sigui bisa cu subsidiario, e ta acusa S.T. di intento di maltrato severo.
Segun S.T., e no tin nada di haci cu e caso. Hues a bisa cu esaki a sosode durante e parada di luz na Oranjestad. S.T. tabata hunto cu su padastro P. y famia den vecindario di waf chikito ta mira e parada. Hues a sigui bisa cu segun e raport di Polis, e homber G. tambe tabata ey banda. Parce cu G. tin problema cu S.T. S.T. a bisa Hues cu door di e problema ey, el a bay biba na Hulanda. El a bin Aruba pa celebra carnaval sin sa cu G. tabata eynan. Segun S.T., G. a yega di menace cu arma di candela y cuchiu y door di esey, G. a haya prohibicion pa ta den cercania di S.T.
SOSPECHOSO TA NENGA DI A HINCA
Segun S.T., dia 8 Februari 2026, e tabata traha ey banda cu su amiga y su famia tabata eynan. Na dado momento el a mira G. tabata para otro banda y tabata keda mira S.T. y tabata zwaai man den S.T. su direccion. S.T. tabata considera esaki un provocacion y S.T. a bisa su padastro P. Ora e padastro P. a wak kico tabata pasando, el a bay riba G. S.T. tambe a bay y a ataca G. caminda el a dal e cu mokete den su zij. Den Corte S.T. a mustra Hues con el a bay dal G.
El a bisa Hues cu manera el a dal G., Polis a presenta. Ta asina cu G. a bisa Polis cu S.T. a hink’e cu cuchiu. Segun S.T. e tabatin un sakito di marihuana y a cana bay na laman y tira esaki afor den laman. Polis a kere cu ta e cuchiu S.T. a tira den laman. Ora Polis a bay busca den laman, no a haya nada. S.T. a bisa Hues cu e no a usa cuchiu. Hues a bisa cu riba camera ta mira S.T. a haci un movecion manera cu e ta hinca G. den su banda. Pero S.T. a bisa cu el a tira mokete den G. su banda. Su intension tabata pa bringa.
S.T. a bisa Hues cu e no sa con G. a haya e hinca pasobra e no tabatin cuchiu. Hues a bisa cu Polis a mira e video di seguridad y ta bisa cu S.T. a haci movecion manera ta hinca. Di biaha ta mira G. ta pone man na banda. Di otro camera ta mira S.T. ta cana bay direccion di laman.
E tabatin algo den man y a hinca rudia, despues a lanta bek. A kere cu ta e cuchiu e lo a tira afor. Segun S.T. e tabatin 15 gram di marihuana y a bent’e afor pa e no bay sera. El a bisa Hues cu e ta bisa e berdad y no ta mira pakico e ta bay gaña. Hues a remarca cu S.T. a duna declaracion diferente na Polis.
Hues a bisa cu G. a sufri un hinca na banda pero nada grave.
Hues a bisa cu S.T. tin mas o menos 6 luna sera. Hues a bisa cu Reclasering su raport ta mustra positivo pa S.T. Pero tin preocupacion si S.T. bolbe topa cu G. Reclasering ta conseha cu lo ta bon cu S.T. cay bou guia di Reclasering pa asina mustra S.T. con e mester anda cu problema.
Hues a bisa cu psycologo tambe a traha un raport di S.T. cu ta mustra cu S.T. no tin problema mental. E psycologo ta mustra cu S.T. ta usa marihuana pa trankilisa su mes pa evita conflicto. Psycologo ta haya S.T. responsabel pa su actonan. Psycologo no ta kere cu lo bay tin problema si S.T. sali liber pero si e conflicto keda cu G., por tin problema atrobe.
S.T. a bisa Hues cu e no kier tin nada cu G. pero si G. ta keda busca problema, kico e mester haci. Hues a bis’e cu lo ta bon bay haci denuncia na Polis. El a bisa cu su intension ta, pa bay bek Hulanda cu su pareha y su yiu di 2 aña.
FISCAL A EXIGI CASTIGO COMBINA
Fiscal a bisa cu 8 Februari 2026, G. a bay bisa Polis cu el a wordo hinca door di S.T. cu tabata ey banda mes. E pregunta ta, si ta S.T. ta esun cu hinca. S.T. ta nenga di hinca pero si cu el a dal G. Ta asina cu na e lugar cu S.T. a dal G., el a sufri e hinca. Na opinion di Fiscal, no tin indicacion cu otro hende lo a hinca G. Riba imagen di camera di seguridad ta mira S.T. ta haci movecion di hinca. S.T. tabatin un lighter den su man. Despues di e pelea ta mira S.T. ta cana bay na laman y ta tira algo den laman. Polis a bay busca y no a haya cuchiu. Segun Fiscal, por ta cu door di coriente di laman no a haya e cuchiu. Ta te dia 12 Februari 2026, Polis a bay check den laman.
Fiscal ta haya haya cu mester declara S.T. liber di intento di mata y castiga S.T. pa intento di maltrato severo. Fiscal a sigui bisa cu e no ta haya cu tabatin motibo hustifica pa S.T. a ataca G. Fiscal a exigi 11 luna di prison di cual 4 luna ta condicional y 2 aña di prueba bou guia di Reclasering.
ABOGADO
Abogado mr. Canwood a bisa Hues cu S.T. ta desmenti categoricamente di a ataca G. cu un arma. E no tabatin un cuchiu manera Fiscal ta acusa. Na opinion di abogado, S.T. a reacciona riba G. cu tabata provoca. E abogado a mustra cu G. tin un prohibicion pa ta den cercania di S.T. E abogado a bisa cu despues cu S.T. a tira mokete riba G., G. ta bisa cu el a wordo hinca. E abogado a mustra cu ningun hende a mira S.T. cu un cuchiu. S.T. a bisa cu e tabatin un lighter den su man. E no tabatin algo punta den su man. El a benta e sakito di marihuana afor den laman y no ta asina manera Fiscal ta bisa cu door di coriente di laman no a haya e supuesto cuchiu. E abogado a bisa Hues cu S.T. no a tira ningun cuchiu den laman sino un sakito cu marihuana. El a mustra cu S.T. sa cu tin camera di seguridad y si e tabatin un arma e lo no bay bent’e den laman eynan.
E abogado a remarca cu Polis no a confronta S.T. cu imagen di camera pa haya claridad kico a sosode. E abogado a bisa cu e lighter cu S.T. tabatin den su man, lo no a causa un herida di hinca. Na opinion di abogado, por bien ta cu door cu G. a trompeca, el a dal contra e heki di DOW y a herida su mes. E abogado a bisa Hues cu mester declara S.T. liber di intento di mata. E abogado ta comparti punto di bista di Fiscal cu mester declara S.T. liber di intento di mata. El a bisa cu e sla di mokete no ta causa un intento di mata. E abogado ta haya cu G. no a sufri herida severo. El a bisa cu despues di tratamento, G. por a bay cas. El a mustra cu S.T. su intension ta, pa bay bek Hulanda. E abogado a pidi Hues pa condena S.T. pa maltrato normal.
HUES TA CASTIGA HOMBER
Hues a sera tratamento di e caso y a dicta sentencia. Na opinion di Hues tin indicacion cu G. a wordo hinca. Tin un raport medico tocante e hinca di G, tin imagen di video cu ta mustra cu S.T. a haci movecion manera ta hinca den banda di G. Ademas S.T. a bay banda di laman pa tira algo afor. Hues a conclui cu no por bisa si S.T. tabatin un cuchiu y tampoco con hundo a hinca. No por papia di intento di mata y tampoco intento di maltrato severo. Hues ta haya proba maltrato cu herida. Hues ta comparti punto di bista di Fiscal, cu algo severo a sosode y sin cu tabatin menaza, S.T. a bay riba G. y dale. Hues a condena S.T. na 11 luna di prison di cual 4 luna ta condicional cu 2 aña di prueba y bao guia di Reclasering. Hues a pone prohibicion pa S.T. bay den sercania di G. y tampoco via otro.
