ORANJESTAD – Den un decision cu a cay manera un shock riba gobierno, hues den kortgeding a ordena Land Aruba pa stop mesora cu e razzia contra e scooternan di e compania di E-bikes. Gobierno tin exactamente 24 ora pa debolbe tur e stepsnan cu nan a confisca diahuebs!
ACCION “BRUTO” SIN AVISO OFICIAL
Tur cos a cuminsa ora cu Minister di Husticia a anuncia via medionan di comunicacion dia 21 di april cu lo bay prohibi e stepsnan electronico riba caminda publico. Sinembargo, segun e sentencia di hues, Dowers NO a manda ningun decision formal ni aviso oficial pa e compania.
Enbes di actua segun ley, gobierno a opta pa publica un “Ultimo Aviso” riba social media dia 29 di april y e siguiente dia mes, a cuminsa ranca/coy e stepsnan for di hotelnan y terenonan priva.
SENTENCIA DI HUES
Hues a considera cu e manera di actua di Land Aruba no tabata uno di un “gobierno cauteloso” (zorgvuldige overheid). Aki ta e puntonan principal di e veredicto:
STOP CU CONFISCACION: Land Aruba tin prohibicion total pa sigui retira steps for di tereno priva of publico.
DEBOLBE TUR COS: Tur e stepsnan cu ya a wordo hiba, mester wordo debolbe na E-bikes den un periodo di 24 ora.
DAÑO ECONOMICO: Hues a enfatisa cu e accion aki ta causando perdida grandi di placa pa e compania, afectando nan trahadonan y proveedornan.
KICO TA SIGUI AWOR?
Maske cu polis por sigui duna boet si nan mira un hende ta comete un infraccion di trafico cu un step, nan no mag bay cu e propiedad di e compania mas. E medida aki ta keda vigente te ora cu tin un decision final den e caso di kortgeding, locual por tarda entre 3 pa 4 siman.
Pa awor, E-bikes ta hala un rosea di alivio, mientras cu gobierno mester busca con pa drecha e palisp cu nan a ricibi den corte.
