Ministerio di Desaroyo Social, Labor y Bienestar (SOAW), den colaboracion cu Selikor y Sosten B.V., a duna comienso na e proyecto Hunto pa un Corsou Limpi.
E proyecto aki ta dirigi riba personanan cu ta ricibi asistencia social (onderstand), cu mediante un trayecto di enseñansa y trabao ta haya e oportunidad pa desaroya nan habilidadnan, adquiri experiencia laboral y prepara nan mes pa un futuro riba mercado laboral.
Durante e trayecto, e participantenan ta contribui activamente na limpieza di e isla, mientras cu nan ta desaroya disciplina, sentido di responsabilidad, trabao den ekipo y confiansa den nan mes.
Selikor ta facilita e oportunidad pa e participantenan adquiri experiencia practico, mientras cu Sosten B.V. ta responsabel pa e guia y sosten psicosocial di e participantenan durante e trayecto. E combinacion di experiencia laboral y guia personal ta importante pa prepara e participantenan pa un siguiente paso riba mercado laboral.
SOAW, Selikor y Sosten B.V. ta satisfecho cu e comienso y desaroyo di e trayecto te cu awor. E participantenan ta mustra motivacion y compromiso den e trabao cu nan ta realisa, locual ta crea un base positivo pa continuacion di e proyecto.
E meta no ta solamente pa ofrece un oportunidad temporal di trabao, sino tambe pa duna e participantenan un base solido pa nan por sigui desaroya nan mes, pasa pa un trayecto di experiencia laboral y finalmente logra haya un trabao regular.
Cu Hunto pa un Corsou Limpi, SOAW ta sigui inverti den desaroyo di ciudadanonan, creando oportunidadnan pa nan bira mas independiente y, na mes momento, contribui na un Corsou mas limpi.
Hunto nos ta traha pa un Corsou mas limpi, cu mas oportunidad pa nos ciudadanonan.
