Con hobennan ta mira e rol di AOV? Diahuebs 19 di november ultimo, 29 alumno di klas cuater di Dr. Albert Schweitzer havo-vwo a debati e pregunta aki na Consejo Social-Economico (SER) di Corsou. Durante un reunion simula, e alumnonan di 15 y 16 aña a asumi e rol di miembronan independiente di e consejo.

Habitantenan di Corsou cu tin derecho riba pension completo di Seguro General di Behes (AOV) ta ricibi Cg 1.000 pa luna desde 1 di januari 2026. Anteriormente, e suma tabata Cg 862. Na september, SER a emiti un conseho tocante e proyecto di ordenansa pa establece e aumento den ley, cu efecto retroactivo desde e mesun fecha.
Segun Oficina Central di Estadistica, entre 2011 y cuminsamento di 2026, e cantidad di habitante di 65 aña of mas na Corsou casi a duplica.
Si prijsnan subi, pension tambe mester aumenta? Y si esaki ta nifica cu trahadornan mester paga mas prima of cu lo resta menos placa pa enseñansa? E alumnonan tambe a debati e posibilidad di aumenta edad pa ricibi AOV, considerando cu hende ta bibando mas aña na promedio.
Preparacion pa e debate
Prome cu e bishita, e alumnonan a ricibi informacion tocante AOV, hunto cu e sugerencia pa lesa e resumen y conclusion di e conseho di SER.
E programa a cuminsa cu un splicacion cortico tocante con SER ta prepara su consehonan. Un stagiaire a comparti su experiencia na secretaria tecnico, mientras cu e grupo a participa den un actividad di pregunta y contesta.
Siña di un manera diferente
Tur aña, e scol ta organisa un siman di proyecto pa permiti alumnonan familiarisa cu mundo laboral. E lema ta ‘anders leren’, locual ta nifica siña di un otro manera.
E aña aki, e scol ta pone enfasis riba e seis metanan di desaroyo sostenibel di Nacionnan Uni cu Corsou a selecciona como prioridad.
Pa e alumnonan di Economie en Maatschappij, e bishita na SER tabata relaciona cu SDG 8, cu ta enfoca riba trabao digno y crecemento economico.





