Recientemente tin un discucion cu CAFT/Raymond Gradus riba e gastonan di ‘goederen en diensten’ di pais Aruba. Gradus a pidi pa corta e gastonan di goederen en diensten cu 39 miyon, pa cual Gobierno a duna oido y a haci tur lo posibel pa corta 13 miyon.

Tin un suma di 28 miyon cu no a logra wordo corta, pasobra esaki lo tin impacto directamente na henter e aparato gubernamental.

Sinembargo Gobierno di Aruba a manda pidi IMF, pa haci un investigacion riba e gastonan di ‘goederen en diensten’ den Caribe, mirando cu esaki ta e punto di salida di CAFT, cu mester tene e gastonan riba mes un liƱa.

E resultado di e investigacion di IMF ta duna cu Aruba su gastonan di ‘producto & servicio’ ta esun di mas abao den Caribe. Pues, e pretencion cu e gastonan ta halto, no ta basa riba berdad ora bo compara esaki cu otro islanan den Caribe.

E pregunta ta bira e ora: Con Raymond Gradus y CAFT ta midi e gastonan? Ta chupe di nan duim?

Si Gobierno a splica na multiple ocacion cu a corta loke tabata por, esta 13 miyon, y pa no paralisa e aparato, no por corta e 28 miyon, ya cu esey lo bay crea problema, ta dicon CAFT y Gradus no kier scucha? Kico ta su afan ?

IMF ta un organsiacion mundial di cual Hulanda ta miembro di dje y nan investigacionnan y hayazgonan ta esun di mas creible pa Gobiernonan y inversionistanan. Awor CAFT ta pretende di ta mas experto cu IMF ?

LEAVE A REPLY

Please enter your comment!
Please enter your name here