Instituto Medico San Nicolas (ImSan) a logra su reacreditacion pa Joint Commission International (JCI), reafirmando su compromiso cu calidad di cuido y seguridad di pashent segun standardnan internacional.
Na 2023, ImSan a marca historia como e prome hospital den Caribe Hulandes cu a logra acreditacion JCI y a ricibi e Gold Seal of Approval for Hospital Accreditation. E acreditacion internacional aki ta confirma cu ImSan ta cumpli cu standardnan di JCI relaciona, entre otro, cu calidad di cuido, seguridad di pashent, control di infeccion, cualificacion di personal y liderazgo.
Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a felicita Hunta di Directiva, gerencia y henter famia di ImSan cu e logro importante aki.
“E reacreditacion aki ta un momento di gran orguyo pa ImSan, San Nicolas y Aruba. Mantene un acreditacion internacional ta exigi dedicacion na calidad, seguridad di pashent y mehoramento continuo. Tras di e reconocemento aki tin profesionalnan cu cada dia ta transforma standardnan riba papel den calidad di cuido den practica,” Minister Wyatt-Ras a expresa.
E Minister a destaca cu e logro aki ta resultado di un esfuerso colectivo di dokternan, enfermeronan, profesionalnan di salud, personal tecnico, personal administrativo y henter e team di ImSan. Tambe el a recorda cu profundo respet e aporte di difunto director Drs. Joël Rajnherc, bou di kende su liderazgo ImSan a logra su prome acreditacion JCI na 2023. E reacreditacion ta demostra cu e compromiso cu calidad a wordo manteni y fortalece den e organisacion.
E logro aki ta conecta cu e vision comparti pa eleva calidad di cuido na Aruba. Un vision cu a sigui wordo construi riba dje desde e periodo cu Richard Visser tabata Minister di Salubridad y cu awe ta sigui forma parti di e direccion pa fortalece nos sistema di salud.
E vision aki ta alinia cu e direccion di Ministerio pa un sociedad saludabel, resiliente y inclusivo, unda cuido y sosten ta contribui na bienestar di cada ciudadano den cada fase di bida.
Minister Wyatt-Ras a enfatisa cu reacreditacion no ta final di e proceso, sino un compromiso cu calidad cu mester wordo manteni tur dia.
“E reto ta pa mantene e nivel alcansa y sigui eleva calidad y seguridad di cuido, semper poniendo e pashent central.”
Gobierno di Aruba ta reconoce e logro importante aki y e dedicacion di henter famia di ImSan pa sigui contribui na un cuido di calidad pa nos comunidad.
