Laga e palabra aki wordo memorisa pa cada un di nos cu ta hende grandi, cu ta yama pa ta hende responsabel door di Dios, pasobra ta boluntad di Dios pa tur mayor ta responsbel.
Salmo 127:3 ta para scirbi: Mira, yuinan ta un herencia di Senjor, e fruta di barica ta un recompensa.
Mateo 18:5-6-7 ta un advertencia hopi cla cu ta bini directamente for di boca di Hesus bisando:
Y ken cu ricibi un mucha asina den Mi nomber, ta Ami e ta ricibi, ma ken cu haci un di e chikitonan aki, cu ta kere den Mi trompica,ta miho pe cu un piedra di molina pisa, wordo cologa na su garganta, y cu e wordo hoga den profundidad di laman.
Ay di e mundo pa motibo di tentacionnan. Pasobra ta inevitabel cu tentacion lo bini,ma ay di hende ey pa medio di ken e tentacion lo bini.
Hopi ta papia tocante proteccion di mucha, pero nan no kier cohe e toro na su cacho, nos muchanan ta den peliger constantemente, door di mentenan maligno, perverso, cu no ta worry cu futuro di e mucha keda traumatisa.
Ta di berdad cu maldad a aumenta, pero awor e abuso di mucha a bisti bachi y dashi, y ta meti tur caminda, e malbado ta structura, e ta scondi, wardando su momento pa haci danjo.
Pero nos tambe como mayor mester duna nos parti, den e educacion di nos yuinan, pa asina haci e trabao di e diabel dificil, door di sinja nos yuinan e palabra di Dios, hunto cu orden, respet, disiplina y especialmente sinja nos muchanan balora nan mes.
Laga nos no haci mucha grandi prome cu su tempo, pasobra ta eyden e peliger ta sinta , ora abo como mayor haci e mucha grandi prome cu su tempo, bo ta forsa su curpa na crece na un nivel cu su mente no ta prepara pe.
No ta cumbini ningun mayor pa pinta hunja y lipstick boca di un mucha cu ta den su infancia ainda, tur cos tin su tempo.
Tampoco ta cumbini ningun mayor laga un mucha cuminsa bisti panja cu no ta pa su edad, pa asina e cuminsa mustra grandi, pasobra asina bo ta habri wowo grandi riba dje, y e tin cu responde na cosnan cu su mente no ta prepara pe.
Fundamenta bo yiu , prome cu tur cos den e palabra di Dios, sinja bo yiu balora su mes, mustre e meta cu mester wordo logra den bida, mustre cu obedencia ta trece respet, y cu decencia ta habri tur porta.
Bisti bo yiu decente, esaki ta conta pa mucha homber y mucha muher pa asina hende tin respet pe, aparta palabra sushi for di su boca, pasobra si palabra sushi tabata haci hende rico, mundo lo no tabatin lugar pa pone miyoniario.
Awendia no tin asunto mas di laga un mucha haci locual cu e kier, bay caminda cu e kier, cana cu hende mas grandi cune, y bisa cu ta mucha homber e ta, no ganja bo mes como mayor tur dos ta corre mesun peliger.
Mescos cu tin hende malbado, perverso, sinberguensa, cu no tin curason ta wak mucha muher, asina tin tambe cu nan bista riba mucha homber, pasobra maldad no tin distincion. ( Juan 10:10).
Ningun hende no por balora bo yiu mas cu bo mes cu ta mayor, corda cu e ta bo simia como tata, y fruta di bo barica como mama.
Cristo Hesus ta abogado di tur mucha,E a bisa esey, pesey nos como mayor, mester obedece Su palabra tur momento.
Sinceramente, Pastor Marcel Balootje
