Cirila Elizabeth Geerman Dubero, Cariñosamente yama Elsa. Pero despues di a guia e hubentud pa varios aña den deporte y otro terenonan social y cultural nan ta duna Sra. Elsa cu tur respet e dushi nomber di Mama Elsa.
Tabata den cuminsamento di añanan 70, Frere Edwin cabesante di Sint Jozefschool cu awor tin e nomber di Colegio San Hose na Santa Cruz a acerca Sra. Elsa pa mira con e por a yuda trece bida bek den Club Estrella. Como presidente di Club Estrella
Frere Edwin kier a uni e hubentud pa dedica nan mes na algo sano specialmente den e ramo di deporte. Pa e bala di varios deporte cuminsa lora mester a acerca tur scol di Santa Cruz pa asina tur mucha haya un carta pa hiba cas pa asina nan por
haya permiso di nan mayor pa bira miembro di Club Estrella (sin costo). Asina Club Estrella su luznan a cuminsa cende y e balanan den tur ramo di deporte a cuminsa lora. Tabata teamnan di Basketball, Volleball, PingPong, Zaalvoetbal y sin kita afo
un grupo di tanto mucha como adolescente a practica Judo. Pa recauda fondo pa yuda tur ramo di e deportenan, a acerca varios comerciantenan. Tambe a organisa varios otro actividad cu bendemento di cuminda, bolo, fiesta pa hubentud y
competencianan amistoso. Den un par di tempo Club Estrella tabata briya cu varios campeonato cu desfile y e teamnan tabata gana nan trofeo of medayanan. Manera cu esaki tabata perfecciona a bay over pa organisa Vakantie kamp pasobra nos
muchanan mester pasa dushi den vakantie y Mama Elsa a haya cooperacion di varios maestro di e scolnan mes cu a bini hunto pa yuda organisa competencia di weganan popular manera core den saco, core cu bala riba cuchara, ranca cabuya,
seso sport y varios otro.
Clausura di e vakantie kamp ta un buitendag na lama.
Club Estrella tabata yen di mucha cu tabata core rond cu hopi alegria. Pa ta sigur cu tur mucha yega cas sano despues di cada evento, Mama Elsa a cumpra un bus chikito y ta hiba tur mucha cas cu no tabatin transporte.
Baile di Cinta:
Mama Elsa ta bira miembro di Oranje Vereneging pa yuda cu actividadnan pa Aña di La Reina den districto di Santa Cruz y mesora un otro luz ta cende y mama Elsa ta dicidi pa lanta su grupo di baile di sinta. Comerciantenan ta bolbe coopera y bus grandi ta yega club pa asina tur bailado por pasa na districtonan rond Aruba pa haci nan presentacion. Sr. Mimi Kock tabata yuda Mama Elsa cu coordinacion di e baile y mas cu claro, cuminda cu algo pa refresca e garganta di e bailadonan no tabata falta.
Carnaval:
Despues di a traha pa varios tempo cu e muchanan cu poco poco a bira teenager, na aña 1975 ta organisa den Club Estrella e prome eleccion di Reina di Carnaval Infantil y ta corona Reina Grandi y Reina Hubenil di Club Estrella.
E hubentud tabata gusta y asina hopi di nan a siña traha traha riba headpiece y varios carosa y esun di mas grandi cu a yega di traha tabata di e bayena Mobi Dick. E trabounan tabata tuma luga tanto na mama Elsa su cas como tambe na Club
Estrella. Hopi hende di tur edad tabata bini hunto pa yuda traha riba grupo di mucha como grupo di hende grandi. Ta bon pa menciona cu e damanan Sra. Lica Thiel y Sra. Carmen Fuentes tur dos den feliz memoria tabata cose tur trahe. Cu
Club Estrella a gana corona di Reina di Carnaval di Aruba, sigur no! y Mama Elsa tabata feliz hunto cu su team y tur miembro cu a bay Stadion Wilhelmina pa apoya.
Santa Cruz Uni pa Carnaval:
Despues ta bin e pensamento pa uni tur club den Santa Cruz y ta lanta Santa Cruz Uni pa Carnaval cu a dura pa varios aña. Durante temporada di Sinterklaas, club Estrella tabata yen di mucha cu ta bin celebra fiesta di Sinterklaas hunto cu nan
mayornan. Ta na Mama Elsa su cas e Sinterklaas y e Pietnan tabata bisti pa despues bay Club Estrella bou pitamento den auto convertible. Ta hopi mucha cu cara spanta tabatin pa no bay den saco, te ora cu un biaha Sinterklaas ta kita cay
di stage unda barba ta cay y e meiter ta bay tur di banda. Tur mucha a cuminsa hari y pietnan na careda pa drecha Sinterklaas bek y pone sinta riba e podium. Hopi mas actividad mama Elsa cu un curason grandi a organisa pa tur mucha y lidernan
cu a yuda.
Famia:
Den tur actividad Papa, y nos como yiu mester yuda special ora tur actividad yega su fin mester bari paden pafo di e club. Mama ta un persona cu no por a para keto, e la bay les pa traha bolo di bruid cu tur su decoracion di flor y brug cu ta pasa di un bolo pa otro. E momento di decoracion ningun yiu mag pasa den cushina pa bolo no kibra. Den Parokia di Santa Cruz y den Misa tabata otro pasion cu mama Elsa a demostra. E la bira miembro di Maria Legion, Curia y varios otro unda e la busca varios dama dinamico di Santa Cruz pa drenta comision y traha pa parokia y te cu awe ainda algun di nan ta haci e trabou pa yuda den Misa.
Les di Bautismo y les di Confirmacion e tabata duna den sala di pastorie. Tin biaha den siman den oranan tempran di mainta Mama Elsa ta compaña pastoor Berlage of Pader Van der Lee pa bishita casnan humilde cu mester di ayudo material y
spiritual. Un di e actividadnan grandi cu mama a tuma na su encargo ta organisa Dia di Enfermo. Un team grandi di homber y muhenan dinamico y fuerte di Santa Cruz tabata yuda saca tur banki y pone nan riba speelplaats di Maria School
pasobra Misa mester keda bashi pasobra Marinierskazerne ta trece nan cotnan pa e enfermonan. For di San Pedro hospital ambulance y autonan di famia ta trece tur enfermo pa Misa di Santa Cruz pa nan pasa un dia unda tin desayuno, cuminda di
merdia y cuminda di atardi pa tur enfermo.
Durante dia tin musica religioso y Santo Sacrificio di Misa pa salud di tur enfermo y pa 5’or ta transporta tur enfermo bek pa
nan cas of hospital. Mama Elsa tabatin hopi suerte pasobra unda cu e la pasa hunto cu su miembronan di comision, comerciantenan tabata yuda tur momento y cu hopi amor. Tabata na aña 78 cu Mama Elsa ta habri su floresteria cu ta hiba e nomber di Elsa’s Flowershop y te cu awe ta un di mas aña di existencia. Momento cu Flowershop a lanta Misa di Inmaculada Concepcion no tabata falta su flornan pa decora altar pa tur ocasion y special San Antonio. Hunto cu Juffrouw Dora ta
coordina e decoracion. Esaki ta enbreve loke por conta di e trayectorio di Mama Elsa den Club Estrella pa guia e hubentud den varios deporte, Parokia di Santa Cruz pa guia e hubentud y famianan pa cana den e caminda corecto como un bon
catolico.
Pa tur trabou cu Mama Elsa a haci e ta haya Condecoracion in de Ridder van Oranje Nassau na 1991. Drumi Dushi nos Mama Elsa, un mama ehemplar y streng cu a sa di lanta su yiunan y nietonan cu hopi respet pa otro. Sosega na Paz
Mama y pa semper den nos curason.
