Un avion cu registro Mericano # N42FL Jet Gulfstream III cu diahuebs anochi a baha na Guatemala riba un pista clandestino carga cu droga, tabata na Aruba algun hora prome.
Diahuebs anochi den careda di 10or / 11or e avion a baha na un pueblo chikito di Guatemala, “Champerico, Retalhuleo” situa na sector di Victoria 3. Radar di e pais a capta ora e avion cu a drenta nan espacio aereo sin permiso.
Mesora a desplega tropanan militar y polis den direccion di e ubicacion duna pa radar pa bay enbusca di e avion y su actividad.
Polis Nacional di Guatemala a informa diabierna cu nan a haya un avion Jet Gulfstream y 4 bulto di droga cu a keda atras.
Ehercito di Guatemala a informa cu diahuebs anochi cu nan a capta e entrada di e avion aki den espacio aereo di Guatemala.
Despues di algun hora militarnan y polis a yega na sitio y encontra e avion bandona y cu algun bulto cu ta contene paki droga cu a keda tras.
DIAHUEBS ATARDI E NARCO AVION TABATA NA ARUBA:
Den un investigacion haci pa SOLO DI PUEBLO nos a descubri cu e avion aki a baha na Aruba diahuebs atardi y a keda algun ora na Aruba. Flighttracker online ta mustra cu e avion a lanta vuelo diahuebs 4.34 di atardi for di Aruba direccion Turks & Caicos.
E flight plan ta mustra ch e avion a lanta vuelo pa Providenciales na Turks & Caicos. Su plan di vuelo ta indica cu pa 5.48 di ataddi e mester baha na Providenciales.
Nunca e avion a baha na Providenciales Turks & Caicos. Asina hefe di aviacion civil di Turks & Caicos a informa Solo di Pueblo.
E motibo pa a stop na Aruba ta pa e avion a fuel.
Procedencia di Sinaloa Mexico:
Recordnan di aviacion ta mustra cu e avion jet gulfstream III registra na Merca N42FL a sali for di Sinaloa Mexico rumbo Aruba, for di un cuidad situa na parti Noord di Sinaloa, Los Mochis. Sinaloa no ta un cuidad desconoci, pasobra e ta e cuidad di El Chapo y como tal e cuidad cu mas ta trafica droga pa hiba Merca.
Destino Providenciales:
E avion a lanta vuelo pa Providenciales pa 4.34 di atardi for di Aruba. Ya pa anochi el’a baha na Guatemala.
Un solo persona den avion:
Fuentenan a divulga na SOLO cu e piloto tabata e unico persona abordo di e avion. Tambe e tabata confuso y indesico. Prome el’a informa cu e ta bay Bahamas pero despues a cambia di idea y bisa cu e ta bay Providenciales.
Su plan tabata traha caba y tabata sa cu su avion ta carga cu droga y mester a laga anochi cera pe por a bay direccion Guatemala.
NA CABES DI ARUBA A PAGA TRANSPONDER:
Flight tracker cu ta monitor tur avion, ta mustra cu e piloto a paga su transponder na cabes di Aruba. Por mira cu ora el’a yega 20 mil pia el’a dal e transponder paga y no ta mita mas unda e ta.
A BANDONA SITIO DESPUES DI ATERISAHE:
E piloto a bandona e sitio unda el’a aterisa lagando avion atras, pero na sitio a haya 4 bulto di droga cu a cay of keda atras.
Ruta aero no ta nobo:
Ta indicacion cu e avion por tabata carga cu droga desde cu el’a sali di Sinaloa, Mexico. No por descarta tampoco cu el’a bin busca droga aki banda (Venezuela of Colombia) pa djey hibe bek Guatemala cu ta bisiña di Mexico y cu ta un ruta masha hopi usa pa rednan criminal.
No ta prome ves cu Aruba su nomber ta wordo menciona, como stop, di avionnan narco. For di 2019, parce Aruba ta popular y ta wordo usa como un stop pa fuel, tanto desde Mexico y pa Mexico.
Riba un raportahe di Caracol TV for di 2019, por lesa con e ruta ta funcciona:
“Desde México, el transporte aéreo sale a Venezuela, pasando por la isla Aruba. Los emisarios mexicanos atraviesan el control del espacio aéreo venezolano, donde un cómplice de las Fuerzas Aéreas de dicho país evita que los narcojets sean derribados.
Una vez librados, viajan a la parte superior de Venezuela y aterrizan en el estado de Zulia, frontera con Colombia.
En este punto, los aviones descienden en pistas clandestinas y son cargados con al menos una o dos toneladas de coca, provenientes del departamento de Santander, Colombia.“
Autoridad di Guatrmala a kima e avion;
Autoridad di Guatemala a dicidi pa cende e avion na candela, pasobra pa lante for di sitio ta riesgoso. Asina tambe a cende na candela y lage kima completo. 
