Director di SVB Edwin Jacobs den documentario 1 aña Landspakket:

ORANJESTAD – E Siman aki Gobierno di Aruba a presenta un programa informativo di 1 aña Landspakket, den cual diferente persona na cabes di organisacionnan importante den e pandemia a splica locual nan a experencia. Temanan cu a bin dilanti ta efecto y consecuencianan den cuadro di covid y condicionnan cu Gobierno di Aruba a implementa pa garantisa salud publico.

Den e documentario a refleha bek riba e tempo cu a firma e acuerdo, unda nos ta para awor y kico nos por spera pa futuro. SVB ta un di e organisacionnan cu tabatin un rol hopi importante durante di e pandemia particularmente den cuadro di areglo di subsidio di salario di trahadonan.

Momento di preocupacion
Director di SVB señor Edwin Jacobs a splica cu el a tuma nota memey di april 2020 tawata di e momento cu hopi ciudadano a ripara cu ta drentando un momento hopi dificil. Esaki ta e momento cu despues di un luna por a mira cu Aruba no ta bay habri facil y cu mundo tampoco ta bay habri facil. E momento ey preocupacionnan a cuminsa di con ta bay paga debe y ki salario ta bay tin fin di luna. Tambe a cuminsa reina hopi intrankilidad den comunidad y a cuminsa busca manera di con ta bay compensa den un forma of otro e perdida grandi cu tabata premira cu e pandemia aki lo a bay trece cu ne.

Sosten financiero
Sr. Jacobs a splica cu na e momento ey Gobierno di Aruba a bin cu e vision pa cuminsa compensa den un forma e perdida di salario di trahadonan. Gobierno a encarga e departamentonan concerni pa diseña locual a bira e areglo di subsidio di salario. Banda di dje, pa yuda sostene e empresanan, evita cu e gran cantidad lo bay cera of bay den bancarota, a introduci pa empresanan mediano y chikito, un areglo di sosten financiero.
“Indudablemente e programanan aki a yuda mantene nos entrada na un nivel acceptabel durante di e pandemia cu nos ta aden ya pa 18 luna”, señor Jacobs a splica.

Durante e 18 lunanan aki, e subsidio di salario a ricibi un total di 24.287 aplicacion di dunadonan di trabou. E subsidio di salario a yuda compensa 299.049 salario y el a representa 213.3 miyon florin. Sin e ayudo aki, no solamente e personanan lo a keda sin trabou, pero tambe e sistema di siguridad social lo a ricibi un golpi inmensamente grandi. Pa loke ta trata e sosten financiero pa e empresanan mediano y chikito durante 7 kwartaal, e programa aki a percura pa duna 11.191 aplicacion e sosten financiero, e montante total di 44.7 miyon florin. “Tin hende cu no a haci uzo debido di e situacion. Nos ta identificando e grupo aki y nos ta bay ta cobrando nan. Ta importante pa realisa cu sin e dos programanan aki di compensacion financiero, e impacto lo tabata devastador, sr. Jacobs a duna di conoce.

Crecemento y recuperacion economico
Sr. Jacobs a sigui splica con durante seminarionan internacional na momento cu splica kico tabata e programanan cu Gobierno di Aruba a presenta pa comunidad durante e pandemia, semper hende ta keda asombra di con un isla chikito a logra percura pa e areglonan aki. Pa asina por pasa den e pandemia y tambe mira con rapido nos economia ta creciendo y ta recuperando. P’esey mester bisa y reconoce cu Aruba ta un isla bendiciona, señor Jacobs a termina bisando.

Prome Minister Evelyn Wever-Croes ta gradici señor Edwin Jacobs pa e splicacion amplio y simpel cu el a duna den e programa special aki. Señor Jacobs durante e pandemia, a traha incansabelmente tambe cu a yuda Aruba den e etapa aki di recuperacion.

LEAVE A REPLY

Please enter your comment!
Please enter your name here