Pa stranjero (imigrante) cu a solicita pa un permiso di estadia na Aruba, y a haya un ‘Voorlopige Toelating Aruba’ (VTA) for di DIMAS, mester presenta cerca un dokter aproba pa Directie Volksgezondheid (DVG) pa un screening medico obligatorio. Na e momentonan aki e screening aki ta wordo ehecuta unicamente pa e dokternan di Medwork. Na momento cu mas dokter keda aproba pa DVG, nos lo menciona esakinan y esaki lo wordo updated riba e website di DVG.
Pa traha un cita pa e screening medico, e solicitante mester presenta personalmente na Medwork situa na Margrietstraat 3, Oranjestad, riba dianan di trabou (dialuna pa diabierna) entre 8:00-12:00 y 13:00-16:00 cu un paspoort valido y e formulario ‘Voorlopige Toelating Aruba’ (VTA). Tambe mester trese e paspoort a base di cual a drenta Aruba ultimo biaha. E gastonan pa cu e screening ta costa Afl. 75.00 y esaki mester wordo paga na momento cu e solicitante bin pa traha e afspraak. E cartanan di referencia pa e diferente tipo di testnan, manera test di PPD/Mantoux, radiografia di pecho y analisis di sanger lo wordo suministra pa Medwork. E costo pa e testnan aki mester wordo paga na e respectivo instancianan medico unda lo haci e testnan necesario.
Mas informacion riba e proceso y instancianan medico unda por haci e diferente testnan por ser encontra riba DVG su website https://dvg.aw/pa/dimas/ of riba website di DIMAS www.dimasaruba.aw.
