Ora pica a drenta mundo den Genesis capitulo 3, pica a causa un fractura ( kiebro) den alma, curpa, mente y spirito di hende.
Inmoralidad no ta solamente sexual, tur locual ta malo ta inmoral.( Galationan 5:19-21, Mateo 15:19).
Awendia unda cu bo bira hende ta papia di salud mental, hopi estudio, hopi tipo di terapia, hopi bishita di psycologo.
Un di e cosnan mas importante pa hende tene cuenta cune, ta con nan ta biba y si nan bida ta agrada Dios.
E problematica di salud mental no ta pica, pero bida cu ta bay completamente for di boluntad y naturalesa di Dios ta haci danjo na salud mental di hende.
Y esey hende tin di reconoce,cu sigi bebe, droga, abusa,violencia,persigicion, trauma,hopi tempo den prison, abuso di salud, tur esey ta debilita salud mental.
Y hasta ora hende usa droga durante embaraso, e ta pone salud mental di e baby cu ta bay nace na peliger y esey hopi hende no a tene cuenta cune 20 of 25 anja pasa pasobra nan no tabata kere.y awe nos tur por mira.
Un bida contra naturalesa y boluntad di Dios ta un bida cu no kier somete na Dios,cu no tin temor di Dios y ta un bida cu hopi biaha a tende e palabra di Dios, pero ta haci bofon, y pa motibo di capricho y curason cu no kier arepenti ta keda den scuridad.
E ladron ta bini , pa horta, pa mata y pa destrui ( Juan 10:10), pero locual hopi no ta compronde ta cu e diabel ta haci esey poco, poco, e ta haci lo siguiente;
Poco, poco e ta penetra cu rabia.
Poco poco e ta penetra cu odio.
Poco poco e ta penetra cu falta di pordon,
Poco ,poco amargura ta aumenta.
Y tur e cosnan aki tin e forsa pa haci danjo na e curpa, mente,alma y spirito.
Anto e persona ta jong y poco, poco e ta cuminsa desvia for di boluntad y naturalesa di Dios, y segun e ta bira grandi e pica ta tuma dominio di henter e curpa cu e chens cu e mente tambe por wordo afecta.
No lubida con e palabra di Dios ta bisa con nos mester stima Dios y nos prohimo den Mateo 22:37-38,
Deuteronomio 6:5, Marco 12:30, Juan 14:15, 1 Juan 5:3.
Pero tambe tene bon cuenta kico e palabra di Dios ta bisa den Juan 3:36, Romanonan 2:5-8 y Romanonan 1 :28-32 kico lo pasa cu esnan cu ta ninga di reconoce Dios.
Mescos cu bondad y obedencia ta mantene hende jong, bunita y cu mente sano, asina tambe maldad, inmoralidad, amargura y falta di pordon ta pone hende mustra bieu, y tambe ta afecta e mente di hende, pasobra nan no kier somete na Dios y pordona, y mientras cu un hende no ta pordona di curason e burdugo ( diabel) lo keda molestia. ( Mateo 18:35).
Hopi cos ta wordo trata superficial, cu ciencia moderno, pasobra hende no kier yega caminda Dios ta, pa asina nan arepenti di henter nan curason, y aparta for di pica y biba pa Dios.
No ta pornada ta para scirbi den 1 Corintionan 6:18-19 bisando: Huy for di inmoralidad, tur otro pica cu hende comete ta pafo di curpa,ma e hende inmoral ta peka contra su mes curpa.
Of boso no sa cu boso curpa ta tempel di Spirito Santo, kende ta den boso,Kende boso tin di Dios, y cu boso no ta pertenece na boso mes.
No laga nos wak leu pero cuminsa cu samina nos propio curason.
Y no laga inmoralidad domina.
Sinceramente,Pastor Marcel Balootje.
