Interes record den Comision di Mayor di Colegio Arubano
Siman pasa diaranson, e comision di mayor di Colegio Arubano (OCCA), a manda un invitacion pa un reunion importante na su miembronan (tur mayor di alumnonan di Colegio Arubano)
E reunion a ricibi un acogida sin igual.
Den e reunion importante aki, e tres miembronan di directiva, a duna algun informacion na tur mayornan presente.
E mesun anochi, a keda eligi e directiva nobo, cual ta consisti di mayornan cu a pone nan mes disponibel, pa forma parti di e directiva nobo, di cual 2 miembro di e comision(re-eligible) a keda, pa forma parti di e comision tambe.
Un grupo di 15 mayor(di e total grandi, di mayornan cu tabata presente) a pone nan mes disponibel, pa forma parti di e directiva nobo
Na final di e prome reunion, e escohencia a wordo haci.
Pa e miembronan di e directiva
nobo, e funcionnan ta como lo siguiente:
• Presidente: Tamara Croes
• Vice Presidente: Sashah Figueroa
• Secretario: Robert Figaroa
• Tesorero: Calbert Maduro
• Marketing Officer: Raffy Kock y
Isabelle ten Lohuis.
E directiva a cuminsa traha, poniendo man na obra, pa yuda sanea e situacionnan actual, cu ta rekeri atencion di inmediato.
Importante tambe ta, cu e comision tin bista ariba un epoca nobo di participacion di mayornan, na e bon ambiente di e scol.
Ta di nota cu hopi di
esnan presente y cu a bira parti di e directiva, ademas di ta mayornan, ta ex colegianonan cu a comparti nan bon experiencia, e temporada cu nan tabata alumno.
E meta y mision di e commision renoba aki ta:
“Pa nos muchanan por disfruta y aprecia nan experiencia di scol secundario, ofreciendo nos sosten,
motivacion y participacion, na tur cu ta interesa, den e comunidad di nos scol, Colegio Arubano!”
E prome tarea cual lo ricibi atencion di inmediato, ta pa logra, pa esnan concerni, debolbe mayornan y alumnonan di klasnan havo 4 y vwo 5, (kende nan a traha cu tanto esfuerso), e suma grandi di placa acumula, pa un biahe di estudio cu a wordo cancela.
Tambe e comision lo busca di obtene mas transparencia den e maneho di entre otro boekenfonds, cual ta un fondo, cu a wordo crea, cu e meta pa yuda e mayornan haya un mihor prijs pa buki y suavisa e gasto, cu segun e comision, no ta cumpliendo cu e meta aki.
Otro punto cu tambe ta di hopi interes pa cu e comision di mayornan, ta otro situacionnan cu actualmente ta desaroyando na e scol, cu tin
efecto negativo, ariba e calidad y experiencia di e studiantenan.
E parti mas importante, ta pa logra pa e muchanan por haya e interes manera mester ta, di sigui scol y tambe pa e docentenan cu ta trahando of cu lo bay traha den futuro, por sinti nan, sosteni y tambe pa mayornan por compronde, cu nan tin un rol importante den crea un comunidad y ambiente sano y exitoso na e scol di nan yiunan.
Segun Señora Croes ta bisa “nos ta cla pa laga un brisa fresco pasa core den henter e scol”.
