Diaranson mainta, Landsrecherche a haci un entrada hudicial na e oficina di Departamento di Progreso Laboral (DPL). Segun informacion cu a drenta cerca nos redaccion di Solo di Pueblo, e investigadornan a confisca varios material, entre nan cahanan cu documento y probablemente tambe computernan di e departamento.
E desaroyo aki ta haci cla cu tin un investigacion penal andando relaciona cu e departamento di gobierno aki. Nos di Solo di Pueblo a tuma contacto mesora cu Ministerio Publico (OM) pa pidi aclariacion riba e asunto aki.
Ministerio Publico no ta nenga e entrada
For di Ministerio Publico nos a ricibi como contesta cu, debi cu esaki ta toca investigacionnan cu ta andando, nan no por duna ningun tipo di informacion detaya na e momento aki. Maske nan no a duna detayes specifici, cu e contesta aki nan no a nenga cu e entrada a tuma luga, confirmando indirectamente cu enberdad tin un caso bou di lupa di husticia.
Kico ta e enfoke di e investigacion?
Te cu awor no ta conoci exactamente kico e recherche ta buscando ni kico ta e motibo specifico tras di e investigacion aki. Sinembargo, ta bon pa remarca cu DPL ta un departamento cu ta maneha tareanan di suma importancia y sensibel pa nos pais, entre otro:
Permiso pa stranheronan: DPL ta encarga pa duna conseho positivo o negativo tocante permisonan di trabou pa stranheronan cu kier traha na Aruba.
Retiro di empleadonan: Nan ta e instancia cu tin cu emiti conseho ora un patron kier retira un empleado.
Debi na e tipo di tareanan aki, caminda hopi interes financiero y di permisonan ta hunga un rol, e departamento aki ta uno hopi vulnerabel pa iregularidadnan.
Preguntanan cu ta keda den aire
Comunidad ta puntra su mes ta kico exactamente a sosode den DPL? Ta trata di malversacion, corupcion, o iregularidad cu permisonan? Y mas aun: tin vinculacion o involucramento di ministernan den e caso aki?
Nos di Solo di Pueblo lo keda masha atento na e desaroyo nobo aki pa mantene nos pueblo informa di ken, cuanto, con y te unda e investigacion aki lo yega.
