Diabierna merdia, e conocido presentador di tv ‘Jan Poets’ a emiti un declaracion publico via su facebook unda el’a trata e tematica di pedofilia. Den su declaracion el’a papia riba varios musico, pero tambe riba un minister. Na final di su grabacion, Jan Poets a lansa acusacionnan pisa contra di Guilfred Besaril, unda a acuse cu apesar di a haya ‘vrijspraak’ e ta culpabel di pedofilia. Pues segun Jan Poets cu Besaril a wordo acusa pa e delito ey dilanti hues. Tambe Jan Poets ta exigi e retiro de imediato di Besaril, kende segun e, no por keda minister, siendo culpabel.
SOLO DI PUEBLO a aserca Besaril na Hulanda pa un reaccion; Besaril a bisa cu el’a pone e caso den man di su abogado. E lo kier tene cortico pa awor y unicamente e por informa cu el’a tuma nota di e acusacionnan y a instrui su abogado pa cuminza un caso contra Eddie Peterson alias Jan Poets pa un rectificacion y disculpa formal. Besaril no kier a bay den mas detayes.
Di otro banda SOLO DI PUEBLO ta na altura cu algun aña pasa un otro persona tambe a lansa e mes acusacion encontra di Besaril y Besaril a hiba e persona aki, esta Melvin Tromp te corte di husticia, unda Melvin a perde e caso totalmente y mester a rectifica y pidi disculpa na Besaril.
Pues den e caso aki di Jan Poets, esaki lo no ta nada otro cu Jan Poets a comete un blunder formal y sin base a muy probablemente a bay over na ‘reken af’ un debe bieu ey cu Besaril.
Un otro fuente a informa SOLO DI PUEBLO cu basta aña pasa, tabatin un ‘clash’ entre Besaril y Jan Poets riba pago di un presentacion di banda musical. Un promotor e tempo ey no a paga e banda musical di Besaril. E tempo ey e cos no a caba a color de rosa. Pues a keda un clabo hinca aden unda kisas a usa e momento aki pa purba saca e clabo, un fuente a divulga na SOLO.
SOLO DI PUEBLO ta condena e hecho unda un of mas persona ta hinca den nan cabes pa tilda o acusa otro hende di delitonan serio, sin cu nan tin ningun prueba. Ora bo pinta un hende preto, mancha su nomber, bo ta cometiendo un delito penal cu ta yama ‘laster’ y ‘smaad’ cual tambe ta castigabel den nos ley penal di straf.
Pues segun nos por compronde, cu abogado di Besaril lo bay tuma e caso over y lo bay exigi Jan Poets pa pone un tremendo rectificacion y disculpa su mes.
