Diabierna atardi un manifestacion grandi a marcha den Oranjestad contra abuso di mucha. Un multitud grandi di hubentud a acudi unda nan a hiba nan plegaria riba cambionan cu nan kier mira pa asina pone un paro na abuso di mucha. Principalmente ta referi na e hecho acusadonan ta haya tiki castigo mientras nan ta laga dañonan grandi atras riba nan victima. Tanto presidente di parlamento Sr. Adi Thijsen como tambe Miniser President, Minister di asuntonan social y Minister di Husticia a sali pa tuma e manifesto.
Cu e manifestacion aki Gobierno di Aruba lo mester bay contempla, pensa, evalua kico nan a haci caba, kico nan falta pa haci y con y ki ora nan lo bay haci’e. Gobierno realmente a ehecuta varios cambio, pero e cambionan aki no a alcansa comunidad. Pueblo practicamente no ta na altura kico tur e gobierno actual a haci. Pues, gobierno ta traha, pueblo no ta wordo informa y tur esaki ta trece confusion den pueblo. Awor Gobiero lo mester re evalua con nan ta bay retoma e tema aki y traha mas duro riba dje.
