Despues di hopi tempo, Aruba por a disfruta di un fashion show, presenta pa Javan Croes, cu a tuma luga diabierna anochi December 3, na Hyatt Place Aruba Airport. E anochi aki tabata uno memorabel, na unda Javan Croes a lansa su mesun marca titula
‘Javan Croes’. Durante e Fashion Show, Javan Croes a presenta tur su trahenan for di e prome coleccion di 14 aña pasa te na su Holiday Coleccion 2021. Na e manera aki Aruba a conose con Javan Croes a crese den e transcurso di e aña nan como un diseñador. A habri e anochi cu e prome coleccion di paña cu el a crea na 2007 durante un anochi di
presentation na Atelier ’89. E coleccion ta titula ‘Confidence’ y ta su prome coleccion di blanco cu preto. ‘Island Love’ tabata e Segundo coleccion cu a ser presenta. Na aña 2018 Javan Croes a participa na Aruba Fashion Week como un di diseñadornan local. Javan Croes a wordo inspira pa Aruba su buniteza natural y e la nombra e coleccion ‘Island Love’. E trahenan ta hopi bunita y elegante.


E tercer coleccion cu Javan Croes a presenta ta titula ‘Curvy Coleccion’ y e esaki tabata su ‘Spring coleccion’ pa 2020. E coleccion aki Javan Croes a presenta durante e ‘Curvy Weekend Event’ na augustus 2019. E ‘curvy coleccion’ ta e prome plus size coleccion cu Javan Croes a diseña y Javan Croes a incorpora e tela floral den su trahenan cual ta pone e bistinan lusi
masha bunita mes.


‘Flora y Fauna’ tabata e di cuater coleccion presenta durante e fashion show. Na januari
2020 Javan Croes a participa na Unoca su competencia di arte y cultura. Den e forma di un
mini coleccion Javan Croes a diseña su coleccion inspira pa e bunita colornan di e flornan y
naturalesa cu Aruba tin. Den e coleccion aki Javan Croes a diseña su prome bachi pa hende
homber cu un toke diferente, na unda e bachi a wordo presenta cu su carson cortico.
Penultimo Javan Croes a presenta su ‘Exclusive Holiday Tote Bags’ 2021. Durante aña 2020
Javan Croes a reta su mes pa crea un tas su mes, cual e ta traha basa ariba pedido. E tote
bags original ta conoci pa ta color solido y e furo paden ta cu tela floral cual bo por kies den
diferente variacion. Diabierna anochi Javan Croes a presenta su tas pa dianan di fiesta cual
tabata color strepia blanco cu cora y paden ta colo preto.
Na final e ‘Holiday Coleccion 2021’ ta uno briyante y hopi elegante. E coleccion aki tabata tin
13 bisti, cual 12 tabata shimis y un set di bachi. E prome 6 bisti tabata colorido cuminsando
cu berde, sigui pa blau y cora. Despues a cambia pa e seccion di preto cu blanco cual ta un
complimento di su prome coleccion. Segun Javan Croes e coleccion di Holiday a wordo
inspira door di Cruella Devil, e pelicula y tambe e elegancia di dianan di fiesta cu nos ta
celebra na Aruba.


Tur coleccion presenta diabierna anochi ta obtenibel riba su website: www.javancroes.com. Tambe por sigui su Instagram of facebook @JavanCroes pa e ultimo update di su siguiente projectonan.


E anochi aki tabata uno hopi exitoso pa Javan Croes y ta manda un palabra di gradicimento na tur esnan cu a aporta pa haci e anochi aki posibel. Sigur un palabra di danki na Mi Marketings cu a yuda organisa e evento, tambe Hyatt Place Aruba Airport y su team cu a logra pa e anochi ta uno fabuloso. Y na cada un di e sponsorsnan cu a aporta den un manera of otro cu Javan Croes por a presenta tur su coleccionnan durante e anochi unico aki. Danki na Alameda Café Aruba, Glam Goddess Aruba, Otis Aruba, Setar N.V., Fa Croes N.V., Click Print N.V., Elite production and entertainment y C&G Services. Siguramente esaki ta djis e comienso di Javan Croes y nos ta spera di mira mas coleccion den futuro di Javan Croes. Ta desea Javan Croes tur clase di exito den e mundo di moda.

LEAVE A REPLY

Please enter your comment!
Please enter your name here