Como presidente di e Fundacion Mito Croes pa Estudio Social Cristian Aruba (FESCA), John Hart a indica diamars mainta cu a desaroya un plan di accion pa AVP ehecuta cu e obhetivo di consolida industria di turismo, mientras ta salvaguardia e producto Aruba tambe.
Esey ta forma parti di e tarea di e fundacion, pa basa riba rapport di Raad van Advies, entre otro y estadistica di entidad den e sector manera ATA y AHATA, formula e miho maneho; uno cu ta berdaderamente ta traduci e prosperidad di turismo den e prosperidad pa pueblo.
“Ora mi drenta un hotel y wak con nos ta trata nos bishitantenan, e ta yena mi di orguyo pasobra mi sa cu ta esey ta ken nos ta como Arubiano. Pero den e siman aki di turismo, ta importante tambe pa nos tin un momento di reflexion,” el politico hoben a indica.
Raad van Advies den su cuenta anual di aña pasa, tambe a haci un analisis, y esey ta cu, aunke turismo ta bayendo bon na Aruba, e no ta traduci den un miho calidad di bida. Hogarnan ta bou di hopi presion y e cost of doing business ta hopi halto.Consequentemente esaki ta traduci su mes na e consumidor. Mescos ku localnan, turista tambe ta experiencia e effecto di e costo di bida halto na Aruba. E crecemento di nos economia mester traduci su mes bek den prosperidad di nos ciudadanonan. Sinembargo, gobierno actual no ta mustra di reconoce cu nos tin reto grandi y ta importante pa tuma paso concreto.
Lider di AVP, Mike Eman a menciona cinco punto cu ta di prioridad pa e partido ora di bin bek den gobernacion, por trece perspectiva nobo pa e sector turistico.
