Parlamentario di AVP John Hart a habri Aña Parlamentario 2026-2027 cu solicitud pa Parlamento trata dos tema fundamental cu tin impacto directo riba futuro di nos hobennan y siguridad financiero di miles di trahado den sector priva: delincuencia hubenil y revision di Ley di Pensioen General.
Segun Hart, ambos ta temanan cu el a trece caba dilanti pa medio di pregunta, reunion y mocion, pero awor mester tin mas claridad tocante e accionnan concreto, responsabilidad di cada ministerio y resultadonan cu gobierno kier logra.
“Un aña parlamentario nobo no por cuminsa solamente cu intencion y promesa. Ta tempo pa mustra kico ta wordo haci, ken ta responsabel y ki resultado pueblo por spera. Parlamento mester haya informacion concreto pa por cumpli cu su funcion di control,” Hart a declara.
Delincuencia hubenil ta exigi un plan integra
Hart a solicita un debate riba e maneho di delincuencia hubenil y kier sa cua ta e plan concreto di gobierno. Pa e parlamentario, e problema no ta responsabilidad exclusivo di Ministerio di Husticia. Ministerio di Asuntonan Social y Ministerio di Enseñansa tambe mester participa activamente den un strategia integra.
“Nos ta mira señalnan preocupante di hobennan, incluso bou di 15 aña, envolvi den atraco y otro delito serio. Nos mester sa kico ta wordo haci pa preveni cu un mucha drenta den criminalidad, pero tambe con gobierno ta actua ora esaki sosode,” Hart a enfatisa.
E debate mester duna claridad riba capacidad di Polis, Jeugd en Zedenpolitie, Ministerio Publico y servicionan di guia. Alabes, Hart kier informacion tocante prevencion den scol, sosten na famia y coordinacion entre e diferente ministerionan y instancianan.
“Papia di prevencion no ta suficiente. Mester tin un plan comparti, cu accion, presupuesto, responsabilidad y evaluacion di resultado,” segun Hart.
Proteccion di pensioen pa sector priva
E segundo tema pa cual Hart a solicita debate ta e revision di Landsverordening Algemeen Pensioen, e ley cu desde 2011 ta regula pensioen general pa trahadonan den sector priva.
Tin aproximadamente 38.000 empleado sigura bou di e ley aki. Hart a trata e tema durante varios ocasion y a urgi gobierno pa institui supervision efectivo, pasobra trahadonan mester tin siguridad cu contribucion reteni for di nan salario ta wordo deposita debidamente den nan fondo di pensioen.
Gobierno a anuncia cu SVB lo fungi como supervisor y cu e ley lo wordo revisa. Awor Hart kier sa te unda e proceso a yega, ki cambio ta wordo prepara y ki ora e sistema nobo lo drenta na vigor.
“Pensioen ta un derecho pa cual hende ta traha y paga prima durante hopi aña. Un ley cu ta proteha e derecho aki no por funciona solamente riba papel. Ta tempo pa Gobierno mustra con e supervision lo funciona den practica,” Hart a declara.
Segun e parlamentario, e dos debatenan ta cuadra cu su compromiso pa uza Parlamento como un lugar pa exigi claridad y impulsa solucionnan concreto.
“Pueblo no mester tende solamente cu gobierno ta ocupa. Pueblo tin derecho di sa kico a wordo haci, cua ta e siguiente paso y ki ora resultado lo ta visibel. E aña parlamentario aki, mi lo sigui controla, haci pregunta y insisti riba accion,” Hart a conclui.
