Durante apertura di Aña Parlamentario 2026–2027, Gobernador di Aruba a presenta e rumbo di Gobierno pa e periodo venidero, cu bienestar general y cuido di hende como punto central. E temanan presenta riba salud, asunto social, cuido di adulto mayor y adiccion ta conecta directamente cu mandato di Ministerio di Salubridad, Asunto Social, Cuido di Adulto Mayor y Maneho di Adiccion.
Ministerio ta enfocando riba diferente leynan, programa y sosten concreto na beneficio di ciudadano, specialmente esnan mas vulnerabel den comunidad.
“Nos ta trahando cu alma y cuerpo pa introduci diferente leynan cu ta na beneficio di ciudadano y esnan vulnerabel den nos comunidad,” Minister Wyatt-Ras a indica.
Entre e prioridadnan pa e periodo venidero ta diferente leynan relaciona cu cuido. Minister Wyatt-Ras a menciona, entre otro, un ley relaciona cu cuido pa personanan cu limitacion y tambe e Landsverordening Langdurige Zorg. Den e discurso di apertura a wordo anuncia cu e ley aki lo crea un base financiero duradero pa cuido continuo, entre otro den casnan di cuido pa adulto mayor y pa rehabilitacion. Tambe lo sigui amplia cuido na cas y den bario.
Riba tereno di salud, Gobierno lo sigui reforma e sistema cu mas atencion pa prevencion, deteccion trempan y cuido di prome liña. Salud mental tambe lo haya atencion, cu enfasis riba ayudo trempan y reduccion di stigma. Minister Wyatt-Ras a splica cu e Ministerio ta amplia e eerstelijnszorg, pa ciudadano por haya cuido y guia mas cerca di cas. Tambe ta den preparacion un plan relaciona cu obesidad, como parti di e esfuerso pa preveni malesanan y promove un estilo di bida mas saludabel.
Den area social, Minister Wyatt-Ras a destaca e aumento di schoolkindertoeslag como un forma di sosten pa famianan cu yiu na scol. Atencion lo sigui bay pa vulnerabilidad social, pobresa, violencia domestico y otro retonan den comunidad. Sosten pa famianan cu yiu cu limitacion tambe ta forma parti di e prioridadnan social di e Ministerio.
Den maneho di adiccion, Ministerio lo sigui enfoca riba prevencion, tratamento y reintegracion, incluyendo problematica relaciona cu alcohol y droga, pa logra miho resultado pa e persona, su famia y comunidad.
Pa Minister Wyatt-Ras, aprobacion di presupuesto di Pais Aruba ta esencial pa pasa di planificacion pa ehecucion. E presupuesto ta crea e base financiero pa proyectonan, instancianan y organisacionnan por haya e recursonan necesario y pa Gobierno por ehecuta su prioridadnan.
E minister a subraya tambe e importancia di cooperacion entre Gobierno y Parlamento. Control y critica parlamentario ta esencial, pero sosten tambe ta necesario pa aproba leynan y recursonan cu ta na beneficio di comunidad.
Ministerio lo sigui traha pa pone e prioridadnan aki den practica y contribui na bienestar y calidad di bida di pueblo di Aruba.
