Apenas cu Gobierno a paga 5%, ya Josefina a start su motornan pa bolbe cuminza ataca. Respetando e dama profundamente cu ta haci su trabao, mester bisa si cu e ta hasiendo dimas y ta fatigando e pueblo cu su yoradera.
Tur hende sa cu tabatin un pandemia. Parce Josefina so no sa!
Tin biaha hende mester ta agradecido na Dios cu nan tin asina un bon trabao ( na gobierno) cu nan por a biba trankil durante pandemia.
Cobrando 95% di salario, ta realmente un bendicion, ora cu Gobierno mester a fia placa di Hulanda pa asina por paga e 95%. Tur e debe cu a bini aserca, ta cay bek riba pueblo awor, pasobra ta pueblo tin cu paga bek e debe.
Nan mester haya consiensa y mester tene tiki mas compacion cu humanidad. Si e placa no a bay solamente pa Fase, el’a bay di tur forma pa Gobierno, cu no tabatin placa y mester a fia.
Nan reaccion ta un exageracion pa un 5% di salario, unda nan a pase bon durante pandemia.
Pues e mensahe cu SOLO DI PUEBLO ta manda pa Josefina ta cu e mester ta agradeci. E mester stop di cansa pueblo, stop di cansa e 37 mil nan cu a perde trabao y cu a pasa den duro. Tur dia ta mes un storia, di un atake continuo.
Mas notabel ta cu Josefina no ta mantene na su mes na trabao di sindicato, pero kier haci trabao politico. Si ta riba e stoel e kier sinta, subi lista y busca voto pa yega na stoel di gobierno.
Mientras bo no ta politico escogi pa pueblo, e ora comportabo cu respet, duna respet, y usa un otro tono, cu no ta esun di insitiga y di falta respet pa Promer Minister.
