ORANJESTAD – Diferente equipo di seguridad y scan a wordo retira awe mainta for di prison KIA, despues cu Gobierno no a cumpli cu pago nan pa varios luna consecutivo.
Segun informacion obteni, un deurwaarder acompaña pa representante legal a yega na KIA pa supervisa retiro di e ekiponan, entre nan sistema di X-ray, walk-through metal detector (WTMD) y detector di cellphone. E equiponan tabata wordo usa diariamente pa screening di bishitantenan y control di seguridad den e prision.
Fuente nan indica cu e compania cu tabata encarga cu huur, servicio y mantencion di e ekiponan a tuma e decision pa retira nan despues gobierno no ta haci pago.
Debi na e situacion, personal di seguridad na KIA lo mester haci controlnan manual y fisicamente te ora cu un otro solucion wordo implementa. Esaki por causa retraso grandi pa bishitantenan, kende posiblemente lo mester warda mas tempo promer cu nan por pasa e proceso di control y drenta e institucion.
E situacion ta genera preocupacion tocante seguridad y e maneho di compromiso di Gobierno.
E pregunta grandi ta: ki intencion gobierno tin ?
