Den weekend cu a pasa CEntro di Bario Noord a conoce un sambombaso di torneo di domino. Ta trata aki di e torneo organisa dor di Eagles Domino Team y cu ta carga e titulo “EAGLES DT First Domino Bush League Tournament”. E total 4 ekipo a participa, di cual mayoria ya ta caranan conoci n’e conocido palacio di pega piedra ay na Kudawecha, esta Domino Square Garden.
Diabierna 15 a tira lot y e siguiente configuracion tabata e resultado: Team Tsunami vs Team Snor, y n’e otro banda dje bracket: Cashero Hills vs Sero Blanco DT. Bou bon ambiente tipico “Nortero”, e bataya a ranca sali, caminda mester admiti tur 4 ekipo a duna un domino di nivel halto! Halftime ta bay aden y Tsunami tin un bentaha leve di 11-8 riba Team Snor, mientras cu Cashero Hills tin un bentaha di 11-9 riba Sero Blanco. Di dos tempo ta dal ranca y aki por bisa ta un “nek aan nek race”! Team Snor ta tuma un bentaha di 19-20 riba Tsunami, pero e ola ta bin duro di atras kibra riba lomba di pober “Snor” Perez: Tsunami ta gana cu 21-20 y ta sigui p’e gran final. Ne otro banda dje bracket, Cashero Hills ta lucha fuerte cu White Hills y ta gana cu score di 21-19 pa asina clasifica tambe p’e final di diasabra anochi.
E gran final ta cuminsa diasabra caminda Tsunami lo enfrenta Cashero Hills pa determina cua team ta corona campeon, y Team Snor lo enfrenta Sero Blanco pa di 3 y 4 luga. Aki shonnan, e final a resulta di ta un berdadero “nail-biter”! Cos ta empata na 20-20, ambos team ta “on the hill” ora cu e grito di alegria di e conocido comerciante den aparatonan electronico resona spanta varios bisiña drumi den becindario di Noord te Alto Vista! Tsunami ta gana Cashero Hills cu score preta di 21-20 y ta corona su mes campeon dje prome torneo bush league organisa pa Eagles DT. N’e otro banda, Team Snor ta pasa den agonia contra Sero Blanco y tambe cu score minimo di 21-20 ta logra domina e nativonan “de la Colina Blanca”! Na final tabata tin e conocido sesion di sacamento di potret caminda varios presente a puntra nan mes ta kico ta “going on” ora nan a wak representante di Sero Blanco ta saca potret c’un yuwana di 100 florin den man. Varios wenkbrauw a bay halto y mes ora e bahul di “conspiracy theories” a dal habri “wagenwijd”! Keda pendiente, e caso ta den proceso di ta “wordt vervolgd …”
